Франция миллий жамоасининг етакчи ҳужумчиси Килиан Мбаппе жаҳон чемпионатлари тарихидаги энг яхши тўпурарлар қаторига кириш ва ҳатто рекордни янгилаш имконияти ҳақида ўз фикрлари билан ўртоқлашди. Унинг айтишича, бу натижага эришиш учун унга атиги тўртта гол етишмаяпти ва бу ҳолатнинг ўзи ҳам катта илҳом манбаи ҳисобланади.
Футболчи таъкидлашича, жаҳон чемпионати — бу оддий турнир эмас, балки бутун футбол оламининг энг юқори чўққиси, барча даврларнинг энг буюк футболчилари иштирок этган мусобақадир. Шу боисдан ҳам ушбу мусобақада юқори натижа қайд этиш ҳар бир футболчи учун улкан шараф ва катта ютуқ саналади.
Шу билан бирга, Мбаппе ўзини ортиқча босимга солмасликка ҳаракат қилмоқда. Унинг сўзларига кўра, шахсий рекордлар ҳақида ўйлашдан кўра, жамоавий натижалар муҳимроқ. “Мен учун асосий мақсад — жамоамга ғалаба қозонишда ёрдам бериш ва яна финалгача етиб бориш. Қолгани эса ўз-ўзидан келади”, — дея қайд этди у.
Ҳозирги кунда 27 ёшли форвард жаҳон чемпионатларида 12 та гол муаллифи бўлиб улгурган. Бу кўрсаткич уни тарихий рекордга жуда яқинлаштириб қўймоқда. Айни пайтда ушбу натижа Мирослав Клозе номида бўлиб, у жаҳон чемпионатлари доирасида 16 та гол уриб, мутлақ рекордчи сифатида қайд этилган.
Футбол мухлислари эса катта қизиқиш билан Мбаппенинг кейинги ўйинларини кузатмоқда. Агар у шу суръатни сақлаб қолса, яқин келажакда жаҳон чемпионати тарихида янги рекорд ўрнатилиши ҳеч гап эмас.
“Zamin”ни Telegram'да ўқинг!
