Ўзбекистон миллий терма жамоаси бош мураббийи Фабио Каннаваро FIFA Series 2026 турниридаги ҳал қилувчи баҳсдан сўнг ўз таассуротлари билан ўртоқлашди. Унинг фикрича, Венесуэлага қарши (0:0, пенальти 5:4) ўйин жамоа учун мазмунли ва самарали бўлди.
«Ўйлашимча, жуда яхши баҳс бўлди. Биз майдонни назорат қилдик ва асосий вақтда ҳисоб очиш учун етарлича имкониятлар яратдик, аммо уларни голга айлантиролмадик. Йигитларга раҳмат, улар иродали ва интизомли ўйин намойиш этишди. Қисқа муддатда икки учрашувни ютиш учун руҳан ҳамда жисмонан кучли бўлиш керак», — деди италиялик мутахассис.
Каннаваро жамоа ўйинини таҳлил қилиб, юқори прессинг ва яккакурашлардаги устунликни эътироф этди. «Ўйинни жуда яхши бошладик. Юқори прессинг қилдик, яккакурашларда устун келдик. Ҳимояда ҳамма футболчилар бир-бири билан уйғунликда ҳаракат қилиши зарур. Ҳимоя фақат ҳимоячиларнинг вазифаси эмас, ярим ҳимоячилар билан ҳам интеграция зарур», — деди у.
Стандарт вазиятлар масаласига ҳам тўхталар экан, Каннаваро унинг учун кўп вақт йўқлигини, аммо Отабек Шукуров ва Азиз Ғаниев каби стандартларни яхши бажарадиган футболчилар борлигини таъкидлади. Жисмоний тайёргарлик борасида эса у футболчиларнинг суперлигадаги тажрибаси билан муносабатда юз берган яхшиланишларни қайд этди ва ёзгача уларнинг формада бўлишини кутиб турганини маълум қилди.
«Стандарт вазиятлар? Бу борада ишлашга вақтимиз кўп эмас, лекин йигитларга керакли кўрсатмаларни бердик. Бизда стандартларни яхши ижро этадиган икки футболчи бор: Отабек Шукуров ва Азиз Ғаниев.
Жисмоний ҳолат? Бу борада ишлаяпмиз, яхшиланяпмиз. Суперлигадаги футболчилар энди 4 та тур ўтказди, ёзгача улар жисмоний ҳолатини янада яхшилайди.», — деди италиялик мутахассис.
Дарвозабон Абдувоҳид Неъматовнинг иштирокини ҳам шарҳлаб, Каннаваро унинг майдонга тушиши пенальти учун эмас, режалаштирилган асосий қарор эканлигини таъкидлади. Шу билан бирга, у ёшлар скаутинги ва келажакдаги жамоа ривожига алоҳида аҳамият қаратмоқда.
Бош мураббий жаҳон чемпионатида вазият ўзгача бўлишини, унда тезлик ва рақобат даражаси баланд эканлигини таъкидлади.
«Жаҳон чемпионати? У ерда бошқача бўлади, ўртоқлик ўйинларидан фарқ қилади. Мундиалда тезлик юқори. Аммо келганимдан бери миллий жамоада фақат ўсишни кўряпман.», — деди Фабио Каннаваро.
Каннаваро Суперлигадаги тиғиз тақвим ва мавсум бошидаги жароҳатлар оддий ҳолат, деб ҳисоблайди ва футболчиларнинг узоқ муддатли самарадорлиги учун тиббий ва техник ишларни кучайтирган.
«Суперлигадаги тиғиз тақвим ва жароҳатлар? Мавсум бошида жароҳатлар бўлиши — нормал ҳолат. Биз тиббий штабни ҳам кучайтирдик, мутахассисларни жалб қилдик. Футболчиларни узоқ муддат яхши даражада ўйнай олиши учун ҳаракат қиляпмиз. Бизга уларнинг вақтинчалик эмас, узоқ вақт юқори даражада ўйнаши муҳим. Албатта, йигитлар ҳам уйқу ва тартибга амал қилиши керак», деди италиялик мутахассис.
Эслатиб ўтамиз, Ўзбекистон терма жамоаси Тошкентдаги FIFA Series 2026 турнирида Габон (3:1) ва Венесуэлани (0:0, пен. 5:4) мағлуб этиб, турнир ғолиби бўлди. Ушбу натижа миллий жамоа учун катта маънога эга бўлиб, келажакдаги халқаро мусобақаларда ҳам Ўзбекистонни умидли деб ҳисоблашга асос беради.
“Zamin”ни Telegram'да ўқинг!
