“Реал Мадрид” клуби собиқ скаути Маноло Ромеро Чемпионлар лигасидан чиқиб кетилганидан кейин жамоа футболчиларига нисбатан кескин фикр билдирди. Унинг сўзлари Испания матбуотида катта муҳокамаларга сабаб бўлди.
Ромеро таъкидлашича, клубга аввало ақлли ва ўйинни тушунадиган футболчиларни жалб қилиш зарур. У айрим ўйинчиларнинг савиясини танқид қилиб, кучли тарихга эга клуб шарафини доим ҳам тўлиқ ҳис қилмайдиганлар борлигини қайд этди.
“Мен тарихдаги энг буюк клуб либосини кийиб юрган, лекин ўйинда етарли даражада ақл билан ҳаракат қилмайдиган футболчиларни кўришдан чарчадим”, — деди у Cadena SER нашрига.
Эслатиб ўтамиз, “Реал Мадрид” икки ўйин натижасига кўра “Бавария”га 4:6 ҳисобида ютқазиб, Чемпионлар лигаси чорак финалида турнирни тарк этди. Бу натижа клуб муҳитида катта норозилик уйғотди.
Ҳозирда мадридликлар Испания чемпионатида иккинчи ўринда бормоқда ва етакчи “Барселона”дан тўққиз очко ортда қолмоқда. Бу эса чемпионлик курашини янада мураккаблаштирмоқда.
Альваро Арбелоа бошчилигида жамоанинг ўйин услуби ва натижалари бўйича танқидлар кучайиб бормоқда. Шу боис келаси мавсум олдидан таркибда жиддий ўзгаришлар амалга оширилиши мумкинлиги айтилмоқда.
“Zamin”ни Telegram'да ўқинг!
