Ўзбекистон миллий терма жамоаси бош мураббийи Фабио Каннаваро “Prime Video Sport IT” YouTube каналига берган интервьюсида Жаҳон чемпионатига тайёргарлик жараёни ҳақида батафсил фикр билдирди.
Унинг таъкидлашича, мундиалга қайта чиқиш — катта масъулият ва кучли босим билан боғлиқ тажриба.
“Жаҳон чемпионатига қайтиш нима эканлиги ҳақида кейинроқ гапирсам ҳам бўлади. Ҳозир эса тўлиқ тайёргарлик жараёнидаман. Футболчиларга имкон қадар кўпроқ маълумот беришга ҳаракат қиляпман, чунки бу улар учун биринчи бундай тажриба,” — деди у.
Каннаваро мундиал босими юқори эканини алоҳида урғулаб, жамоани руҳан тайёрлаш муҳимлигини айтди.
“Жаҳон чемпионати — жуда катта босим. Шунинг учун футболчилар майдонга ‘йўқотадиган ҳеч нарсамиз йўқ’ деган кайфият билан чиқиши керак. Бу жуда муҳим психологик жиҳат,” — деди мураббий.
У Ўзбекистон терма жамоасини реал баҳолаб, жамоанинг асосий кучи меҳнат ва интизом эканини қайд этди.
“Биз ҳали катта фаворит эмасмиз. Чемпион бўлиш даражасидаги жамоа эмасмиз. Лекин биз меҳнаткаш, ҳар қандай рақибга қийинчилик ярата оладиган жамоамиз,” — деди Каннаваро.
Шу билан бирга у футболчилардан таслим бўлмаслик руҳини талаб қилаётганини ҳам айтди.
“Мен шундай ўйинчиларни мундиалга олиб боришни истайманки, улар ҳеч қачон таслим бўлмасин. Бу энг асосий принцип,” — дея таъкидлади у.
Мураббийнинг сўзларига кўра, асосий вазифа — дебют ўйиндаги босим ва қўрқувни йўқотиш.
“Менинг вазифам — биринчи ўйиндаги босимни олиб ташлаш. Фақат шу ўйинда. Кейин ҳаммаси енгилроқ бўлади,” — деди у.
Каннаваро жамоанинг гуруҳ босқичи жуда қийин бўлишини ҳам яширмади.
“Биз жуда мураккаб гуруҳдамиз. Бир очко ҳам катта натижа бўлиши мумкин. Лекин ҳаммасини майдон кўрсатади,” — деди у.
У шунингдек, Италиядан кўплаб мухлислар қўллаб-қувватлашини ҳис қилаётганини айтди.
“Кўп италияликлар биз учун қувонади. Лекин энг муҳими — бу Ўзбекистоннинг биринчи мундиали,” — деди мураббий.
Якунда эса у келажакдаги Осиё Кубоги ҳақида ҳам фикр билдирди.
“Мундиалдан кейин тез орада Осиё Кубоги ҳам бор. У Саудия Арабистонида ўтади. У ерга биз завқ олиш ва яна ўсиш учун борамиз,” — дея сўзини якунлади Каннаваро.
