Испаниянинг “Атлетико Мадрид” клуби бош мураббийи Диего Симеоне келажакда фаолиятини Англия Премьер-лигасининг етакчи жамоаларидан бирида давом эттириши мумкин. Бу ҳақда The Sun нашри хабар тарқатмоқда.
Манба маълумотларига кўра, Лондоннинг “Челси” клуби аргентиналик мутахассисни таклиф қилиш вариантини жиддий кўриб чиқмоқда. “Аристократлар” раҳбарияти ҳозирги мураббий Лиам Росеньор қўл остидаги натижалардан қониқмагани учун янги вариантларни изламоқда.
Симеоне эса футбол оламида узоқ йиллардан бери ўз услуби ва қатъий тактикаси билан танилган мураббийлардан бири ҳисобланади. У 2011 йилдан буён “Атлетико Мадрид” жамоасини бошқариб келмоқда ва клубни Европанинг энг кучли жамоалари қаторига олиб чиққан.
Унинг раҳбарлигида мадридликлар бир неча бор Ла Лигада совринлар учун курашган ва Европа аренасида ҳам барқарор натижалар кўрсатган.
Маълумот учун, Симеоненинг “Атлетико” билан амалдаги меҳнат шартномаси 2027 йил июнь ойи охирига қадар давом этади. Шу боис унинг эҳтимолий трансфери ҳали мураккаб масала сифатида қолмоқда.
Қисқаси, агар бу вариант амалга ошса, Премьер-лига яна бир топ-даражадаги мураббий билан тўлдирилади. Мухлислар эса Симеоне Англия футболида қандай из қолдиришини катта қизиқиш билан кузатишмоқда.
“Zamin”ни Telegram'да ўқинг!
