УЕФА Чемпионлар лигасининг амалдаги ғолиби “Пари Сен-Жермен” яқинлашиб келаётган ёз трансфер ойнаси олдидан “Манчестер Сити” ярим ҳимоячиси Бернарду Силвани қўлга киритиш учун курашга қўшилди. Португалиялик футболчи атрофидаги вазият янада қизимоқда.
Манбаларга кўра, Силванинг “Манчестер Сити”дан кетиши деярли аниқ бўлиб улгурган. Ҳозирги босқичда эса унинг келажаги бўйича бир неча вариантлар кўриб чиқилмоқда.
Футболчига энг яқин йўналишлардан бири сифатида “Бенфика”га қайтиш эҳтимоли тилга олинмоқда. Шу билан бирга, “Барселона” ҳамда кейинчалик ПСЖнинг қизиқиши вазиятни бутунлай ўзгартириши мумкин.
Париж клуби Силва учун аввал ҳам икки маротаба жиддий таклиф билан чиққан. Хусусан, 2023 йилнинг ёзида француз гранди ярим ҳимоячи учун 70 миллион евро атрофида таклиф берган, бироқ “Манчестер Сити” бу таклифни рад этган. Кейинги трансфер ойнасида ҳам ПСЖнинг уринишлари натижа бермаган.
Эндиликда эса вазият бошқача. Бернарду Силва шартнома муддати якунланишига яқинлашгани сабаб эркин агентга айланиш имкониятига эга. Шу боис, унинг атрофидаги молиявий таклифлар ва бонус пакетлари “Парк де Пренс”ни жуда жозибали вариантга айлантирмоқда.
Қисқаси, Силва трансфери ёзнинг энг қизиқ мавзуларидан бири бўлиши кутилмоқда ва ПСЖ бу курашда жиддий устунликка эришишга ҳаракат қилмоқда.
“Zamin”ни Telegram'да ўқинг!
