Ламин Ямал жаҳон футболида ўз ўрнини мустаҳкамлаб борар экан, у ўз кумири ҳақидаги фикрлари билан ҳам ўртоқлашди. "Барселона" ва Испания миллий жамоаси вингери сифатида танилаётган ёш иқтидор Лионел Мессини барча даврларнинг энг буюк футболчиси сифатида баҳолади.
Ямалнинг таъкидлашича, Месси нафақат футбол тарихида, балки умумий спорт оламида ҳам энг юқори даражадаги юлдузлардан бири ҳисобланади. У аргентиналик ҳужумчининг ютуқлари ва майдондаги ўйини бутун дунёда ҳурмат қозонганини алоҳида қайд этди.
«Лео Месси — барча даврларнинг энг яхши футболчиси. Агар у тарихдаги энг яхши спортчи бўлмаса ҳам, шубҳасиз, энг кучлилар қаторига киради. Эришган ютуқлари учун ҳамма уни ҳурмат қилади ва мен ҳам унинг изидан боришга умид қиламан», — деди Ямал.
Бугунги кунда Месси "Интер Майами" клубида фаолиятини давом эттирмоқда. У 2023 йилдан буён АҚШ жамоаси шарафини ҳимоя қилиб келяпти ва жамоа билан қатор муҳим совринларни қўлга киритди. Жумладан, у MLS кубоги, мунтазам чемпионат ғолиблиги, Шарқий конференция чемпионлиги ҳамда Лигалар кубоги каби мусобақаларда зафар қучди.
Маълумотларга кўра, Мессининг амалдаги шартномаси 2028 йилгача мўлжалланган бўлиб, у ҳали бир неча мавсум юқори даражада тўп суриши кутилмоқда.
Ямал каби ёш юлдузлар учун эса Месси нафақат ўйинчи, балки ҳақиқий илҳом манбаи. Янги авлод футболчилари айнан шундай афсоналар изидан бориб, ўз номини тарихга муҳрлашга ҳаракат қилмоқда.
“Zamin”ни Telegram'да ўқинг!
