"Барселона" жамоаси учун жиддий йўқотиш юз берди — иқтидорли вингер Ламин Ямал жорий мавсумнинг қолган қисмида майдонга туша олмайди. Клуб матбуот хизмати бу ҳақда расман маълум қилди.
18 ёшли футболчи Ла Лига доирасидаги "Сельта"га қарши учрашувда жароҳат олганди. У биринчи бўлимда пенальти ижро этаётган пайтда ноқулай ҳаракат қилиб, майдонни тарк этишга мажбур бўлган.
Дастлабки тахминларда сон орқа қисми мушаги шикастлангани айтилган эди. Кейинги тиббий текширувлар эса бу гумонларни тасдиқлади — Ямалда мушак жароҳати борлиги аниқланди.
Шу сабабли ёш юлдуз Ла Лигада мавсумнинг қолган ўйинларини ўтказиб юборади. Бу “Барселона” учун ҳужум чизиғида сезиларли йўқотиш ҳисобланади, чунки Ямал сўнгги вақтларда жамоанинг энг фаол ва хавфли футболчиларидан бирига айланган эди.
Бироқ ижобий жиҳати ҳам бор — шифокорлар прогнозига кўра, футболчи тўлиқ тикланиб, жаҳон чемпионатига тайёр ҳолда қайтиши мумкин.
Энди каталонияликлар мавсумнинг ҳал қилувчи палласида Ямалсиз қандай натижа кўрсатиши катта савол бўлиб қолмоқда.
