«Арсенал» ҳимоячиси Вилям Салиба Англия Премьер-лигасидаги чемпионлик пойгаси ҳал қилувчи паллага киргани ҳақида жамоадошларини огоҳлантирди. Франциялик футболчи кетма-кет мағлубиятлардан сўнг жамоа бор кучини ишга солиши шартлигини таъкидлади. Унинг фикрича, Лондон клуби ўтган мавсумдаги хатони такрорламаслик учун ҳар бир ўйинда максимал фидойилик кўрсатиши лозим. Бу ҳақда Goal.com хабар беради.
Микел Артета шогирдлари «Борнмут» ва «Ман Сити»га қарши баҳсларда имкониятни бой бериб, турнир жадвалида иккинчи ўринга тушиб кетди. Ҳозирда «шаҳарликлар» тўплар нисбатига кўра пешқадамлик қилмоқда. Апрель ойидаги анъанавий пасайишдан сўнг, «канонирлар» чемпионлик умидини сақлаб қолиш учун навбатдаги турда «Нюкасл»га қарши майдонга тушади.
Клуб расмий сайтига берган интервьюсида Салиба жамоа аъзоларини майдонда борини беришга ундади. «Биз хотиржам бўлишимиз ва майдонда ўлишимиз керак, чунки ҳозир айни вақти. Мухлислар, жамоа ва ходимлар — барчамиз бирлашишимиз шарт. Мавсум тугаганидан кейин кеч бўлади, ҳамма нарсани ҳозир ҳал қилиш лозим», — деди ҳимоячи.
«Арсенал» 2004 йилдан буён Премьер-лигада ғолиб чиқа олмаётгани Салиба учун ҳам шахсий мотивацияга айланган. Англиядаги фаолияти давомида икки марта иккинчи ўринни эгаллаган футболчи бу сафар олтин медалларни қўлга киритишга ишонмоқда. Унинг сўзларига кўра, жамоа руҳий босимга тайёр ва орзуларни амалга ошириш учун қолган беш ҳафтада хато қилишга ҳаққи йўқ.
