"Челси"да катта "тозалаш": бир қатор футболчилар кетиши кутилмоқда

Лондоннинг "Челси" клубида ёзги трансфер ойнаси олдидан жиддий ўзгаришлар кутилаяпти. Football Transfers нашри маълумотига кўра, жамоани бир нечта футболчилар тарк этиши эҳтимоли юқори.

Аввало, марказий ҳимоячи Аксель Дисасининг келажаги ноаниқ. У ҳозирда "Вест Хэм" сафида ижарада ўйнамоқда ва асосий таркибда мунтазам майдонга тушяпти. Агар “болғаурарлар” Премьер-лигада жойини сақлаб қолса, футболчини тўлиқ трансфер қилиш эҳтимоли бор. Акс ҳолда, "Челси" уни сотиш учун янги вариантлар излайди.

Ҳужум чизиғида ҳам ноаниқликлар етарли. Николас Жексон "Бавария"да қолишни хоҳлаётган бўлса-да, унинг ўйини мюнхенликларни тўлиқ қониқтирмаган. Шу сабабли сенегаллик форварднинг Лондонга қайтиши эҳтимоли ортиб бормоқда.

Шу билан бирга, Алехандро Гарначони тахминан 40 миллион фунт эвазига сотиш варианти ҳам кўриб чиқилмоқда. Аввалги бош мураббий Лиам Росеньор унинг келажаги борасида аниқ позиция билдирмагани бу қарорга таъсир қилган.

Яна бир эҳтимолий кетувчилардан бири — Лиам Делап. У жорий мавсумда Премьер-лигада бор-йўғи битта гол урди ва бу натижа юқори даражадаги рақобатда етарли эмас.

Ҳимояда эса Бенуа Бадиашиленинг аҳволи мураккаб. У асосий таркибдан тушиб қолган ва 2026 йил январидан бери АПЛда майдонга тушмаган. Шу сабаб унинг трансфери ҳам деярли аниқдек кўрилмоқда.

Қисқача айтганда, "Челси"да катта “тозалаш” бошланмоқда. Клуб янги босқичга ўтиш учун таркибни қайта қурмоқчи ва бу жараёнда бир қатор футболчилар билан хайрлашишга тайёр.