Артета норози: "Баҳсли қарорлар чемпионлик курашига таъсир қилмоқда"

Англия Премьер-лигасининг 34-турида "Арсенал" ўз майдонида "Ньюкасл Юнайтед"ни 1:0 ҳисобида мағлуб этиб, очколарини 73 тага етказди ва яна турнир жадвалида пешқадамликни қўлга олди.

Бироқ чемпионлик пойгаси ҳали очиқ. "Манчестер Сити" Англия Кубоги ярим финали сабаб айрим ўйинларни олдинроқ ўтказган ва агар “Кристал Пэлас”га қарши қолдирилган баҳсда ғалаба қозонса, яна биринчи ўринни қайтариб олиши мумкин.

Учрашувдан кейин Микел Артета нафақат ғалаба, балки баҳсли эпизодлар ҳақида ҳам кескин фикр билдирди. У “Сити”га қарши ўйинда Абдуқодир Ҳусановнинг майдондан четлатилмаганини, шунингдек “Ньюкасл” дарвозабони Ник Поуп билан боғлиқ вазиятни танқид қилди.

Испаниялик мутахассиснинг фикрича, “Этихад”даги ҳал қилувчи баҳсда рақиб 10 киши бўлиб қолганида, чемпионлик кураши бутунлай бошқача тус олиши мумкин эди. У Ҳусанов 53-дақиқада Кай Хаверцга қарши “охирги умид фоли” учун қизил карточка олиши керак эди, деб ҳисоблайди.

“Агар ўтган якшанба “Этихад” стадионидаги ҳал қилувчи ўйинда “Манчестер Сити” ўн киши бўлиб қолганида, Премьер-лига чемпионлиги учун курашда ҳаммаси бошқача кечган бўлар эди”, - деди Артета.

Шу билан бирга, “Ньюкасл”га қарши ўйинда ҳам баҳсли ҳолат кузатилди. 74-дақиқада Ник Поуп жарима майдонидан ташқарида хатога йўл қўйиб, Виктор Дьёкерешга қарши қоидабузарлик қилди. VAR бу эпизодни текширган бўлса-да, ҳакам қарорини ўзгартирмади ва дарвозабон фақат сариқ карточка билан чекланди.

Артетага кўра, бундай қарорлар чемпионлик пойгасида ҳал қилувчи аҳамиятга эга бўлиши мумкин. Бу фикрни The Guardian эксперти Дэвид Хайтнер ҳам ёритиб ўтди.

Қисқача айтганда, "Арсенал" майдонда ўз ишини қилди, аммо чемпионлик кураши фақат ўйин билан эмас, қарорлар билан ҳам ҳал бўлаётгандек. Энди ҳар бир эпизод олтинга тенг аҳамият касб этмоқда.