"Реал Мадрид" раҳбарияти келгуси мавсум олдидан катта ўзгаришларга қўл уришни режалаштирмоқда. Клуб бош мураббийлик лавозимига Юрген Клоппни таклиф қилиш ва уни Тони Кроос билан биргаликда ишлаш вариантини жиддий кўриб чиқяпти.
Бу ҳақда журналист Рамон Алварес де Мун маълум қилди. Унга кўра, немис мутахассиси ҳозир ҳам “қироллик клуби” учун энг устувор номзод сифатида қаралмоқда.
Клуб ичида Клоппнинг тажрибаси алоҳида қадрланмоқда. У турли чемпионатларда ишлаб, юқори натижаларга эришган, катта босим остида ишлашни яхши билади. Шу жиҳатлар уни мадридликлар учун идеал танловга айлантирмоқда.
Қизиғи шундаки, фақат мураббий эмас, балки янги лойиҳа сифатида Тони Кроосни ҳам жамоага қайтариш ғояси муҳокама қилинмоқда. Немис яримҳимоячиси клуб тарихи ва ўйин фалсафасини чуқур билади, шу сабаб унинг қайтиши Клопп учун қўшимча таянч бўлиши мумкин.
Манбаларга кўра, Клопп ва Кроос ўртасидаги муносабатлар ҳам жуда яхши. Улар бир-бирига ишонади ва ўзаро тушуниш даражаси юқори. Бу эса янги лойиҳанинг муваффақияти учун муҳим омиллардан бири сифатида баҳоланмоқда.
Қисқача айтганда, "Реал Мадрид" янги босқичга тайёргарлик кўряпти. Агар ушбу сценарий амалга ошса, “Бернабеу”да мутлақо янги, энергияга тўла давр бошланиши ҳеч гап эмас.
