Калверт-Люин Кукурелянинг сочидан тортгани учун жазоланмади
Англия кубоги ярим финалида «Лидс» ҳужумчиси Доминик Калверт-Люин рақиби Марк Кукурелянинг сочидан тортгани учун жазосиз қолди. VAR тизими вазиятни синчиклаб ўрганган бўлса-да, ҳакамлар футболчига нисбатан ҳеч қандай интизомий чора кўришни лозим топмади. Бу қарор жамоатчиликда катта эътироз уйғотди, чунки яқинда худди шундай қоидабузарлик учун бошқа бир футболчи майдондан четлатилган эди. Ҳозирда экспертлар ва мухлислар ҳакамликдаги бундай қарама-қарши ёндашувни кескин танқид қилишмоқда.
Англия кубоги ярим финали доирасида «Уэмбли» стадионида бўлиб ўтган «Лидс» ва «Челси» жамоалари ўртасидаги баҳсда ҳакамлик билан боғлиқ баҳсли вазият юзага келди. «Лидс» ҳужумчиси Доминик Калверт-Люин рақиб ҳимоячиси Марк Кукурелянинг сочини тортган бўлса-да, майдонда қолишга муваффақ бўлди. Бу ҳақда Goal.com хабар беради.
Ушбу ҳолат VAR тизими орқали узоқ вақт давомида кўриб чиқилди. Видеотакрорларда ҳужумчи «Челси» аъзосига нисбатан қўполлик ишлатгани аниқ кўринган бўлса-да, ҳакамлар бригадаси футболчини жазолашга асос топа олмади.
Якунда Калверт-Люин ҳеч қандай интизомий чорасиз ўйинни давом эттирди.
Мазкур воқеа жамоатчилик орасида катта муҳокамаларга сабаб бўлди. Сабаби, атиги икки ҳафта олдин Премьер-лига доирасидаги «Манчестер Юнайтед» ва «Лидс» учрашувида Лисандро Мартинес айнан Калверт-Люиннинг сочини тортгани учун майдондан четлатилган эди.
Экспертлар ва мухлислар бир хил турдаги қоидабузарлик учун икки хил қарор қабул қилинганидан норози бўлишмоқда. Ҳозирча ҳакамлар қўмитаси ушбу қарама-қарши қарорлар юзасидан расмий муносабат билдирмади.
Изоҳлар 0
…