Англия Премьер-лигасида чемпионлик пойгаси қизғин нуқтага кирган бир пайтда «Манчестер Сити» бош мураббийи Хосеп Гвардиола кескин баёнот билан чиқди. У «Арсенал» мухлисларининг «Микель Артетага чемпионликни беринг» деган чақириқларига аниқ ва қаттиқ жавоб қайтарди.
Испаниялик мутахассис бу лигада ҳеч кимга ҳеч нарса текинга берилмаслигини алоҳида таъкидлади. Унинг сўзларига кўра, барча ютуқлар меҳнат, интизом ва кураш орқали қўлга киритилади.
«Унга ғалаба қозониш имконини берайми? Бу хайрия эмас, бу — Премьер-лига. Менга ҳеч ким ҳеч нарса бермаган, ҳаммасини ўзим олганман. Агар Артета чемпионликни хоҳласа, у қаерда эканимни билади. Мени четга чиқаришни эмас, майдонда енгишни ўйланг. Мен ғалаба қозонишдан чарчамайман», — деди Гвардиола.
У шунингдек, «Арсенал»ни чемпионликка лойиқ деб атаётганларга ҳам савол ташлади: «“Арсенал”ни чемпионликка лойиқ, дейишяпти. Нима учун лойиқ? Чунки иккинчи ўринни чиройли қилиб олгани учунми? Совринлар раҳм-шавқат билан берилмайди. Агар менинг ғалабаларимни истамасангиз — мени тўхтатинглар. Ҳаммаси жуда оддий».
Маълумки, айни дамда чемпионлик учун асосий кураш айнан «Арсенал» ва «Манчестер Сити» ўртасида кечмоқда. Қолган жамоалар эса бу пойгадан анча олдин четда қолган.
Қисқача айтганда, Гвардиола сигнални аниқ берди: бу ерда ҳиссиёт эмас, натижа ҳал қилади. Чемпионликни истасанг — олиш керак, сўраб эмас.
“Zamin”ни Telegram'да ўқинг!
