«Ноттингем Форест» «Порту»ни мағлуб этиб, ярим финалга йўлланма олди

«Ноттингем Форест» жамоаси Европа Лигаси чорак финал жавоб учрашувида «Порту» устидан 1:0 ҳисобида ғалаба қозонди. Икки ўйин натижасига кўра 2:1 ҳисобида устун келган инглиз клуби мусобақанинг ярим финалига йўлланмани қўлга киритди. Бу ҳақда Goal.com хабар беради.

Учрашувдаги ягона гол муаллифи Морган Гиббс-Уайт ўз муваффақиятини жамоадоши Эллиот Андерсонга бағишлади. Ярим ҳимоячи голни нишонлаш вақтида онаси Хеленнинг вафоти муносабати билан таркибни тарк этган Андерсонни қўллаб-қувватловчи махсус хабарни намойиш этди.

«Ноттингем Форест» футболчилари майдонда Андерсоннинг 8-рақамли либосини кўтариб, «Оила биринчи ўринда. Биз барчамиз сен биланмиз» деган сўзлар орқали ҳамдардлик билдиришди.

Клуб расмий баёнотида футболчининг оиласига чуқур таъзия изҳор қилинган.

Хелен Андерсон ўғлининг фаолиятини доимий равишда кузатиб борган ва унинг «Нюкасл» академиясидан Премьер Лигагача бўлган йўли билан фахрланган. Эндиликда «Ноттингем Форест» ярим финалда Англиянинг бошқа бир жамоаси «Астон Вилла»га қарши майдонга тушади.

Nodirbek Razzokov

«ZAMIN.UZ» муҳаррири

+ Zamin.uz сайтини Googleга қўшинг