"Реал Мадрид" ўнг қанот ҳимоячиси Трент Александер-Арнолд Европа Чемпионлар лигаси чорак финалининг биринчи учрашувида "Бавария"га қарши ўйиндаги ҳаракатлари учун кескин танқид қилинди. Мадридда бўлиб ўтган баҳсда мезбонлар 1:2 ҳисобида имкониятни бой беришди. Бу ҳақда Goal.com хабар беради.
"Манчестер Юнайтед" афсонаси Рой Кин англиялик футболчининг ўйинини қаттиқ қоралади. Унинг таъкидлашича, Александер-Арнолд Луис Диаснинг биринчи гол уришига йўл қўйиб берган вазиятда жуда суст ҳаракат қилган.
Гарчи Трент Килиан Мбаппенинг ягона голига ассистентлик қилган бўлса-да, бу унинг ҳимоядаги камчиликларини ёпа олмади.
«Мен чарчадим. Ҳар бир катта ўйинда бир хил ҳолат такрорланади.
Одамлар доим унинг паслари қанчалик яхши экани ҳақида гапиришади, лекин ҳимоядаги асосий вазифалар нима бўлади? Чемпионлар лигаси даражасида бундай хатоларга йўл қўйиб бўлмайди», — деди Кин CBS телеканалига берган интервьюсида.
Экспертнинг фикрича, Луис Диаснинг ҳимоячини осонгина ортда қолдириши қабул қилиб бўлмас ҳолатдир. Кин футболчининг ҳаракатларини «болаларча хато» деб атади ва у ўз позициясида ҳеч қачон ўйнамагандек таассурот қолдирганини қўшимча қилди.
Маълумот учун, Александер-Арнолд жорий мавсум бошида "Ливерпуль"дан "Реал Мадрид" сафига келиб қўшилган эди.
Жамоалар ўртасидаги жавоб учрашуви келаси чоршанба куни Мюнхен шаҳридаги «Альянс Арена» стадионида бўлиб ўтади. Ушбу жуфтлик ғолиби ярим финалда "PSJ" ҳамда "Ливерпуль" қарама-қаршилиги ғолиби билан куч синашади.
“Zamin”ни Telegram'да ўқинг!
