"Бавария" Чемпионлар лигаси ўйини олдидан "PSJ"ни меҳмонхонасиз қолдирди

"Бавария" ва "PSJ" ўртасидаги Чемпионлар лигаси ярим финал жавоб учрашуви олдидан меҳмонхона борасида келишмовчилик юзага келди. Парижликлар дастлаб Мюнхен чеккасидаги тўрт юлдузли "Инфинитй" меҳмонхонасида қолишни режалаштирган эди. Бу ҳақда Goal.com хабар беради.

Бироқ, Германия чемпионлари ушбу меҳмонхонани аллақачон банд қилиб қўйган. "Инфинитй" меҳмонхонаси стадиондан атиги 15 дақиқалик масофада жойлашган бўлиб, "Бавария" учун уй ўйинлари олдидан севимли жой ҳисобланади.

Жамоа бош мураббийи Винсент Компани ва спорт директори Кристоф Фройнд ўзларининг одатий жойларидан воз кечишни истамади. Компани матбуот анжуманида «Бу бизнинг шаҳримиз, биз Инфинитй меҳмонхонасида қоламиз» деб таъкидлади.

"PSJ" ўтган йили Чемпионлар лигаси финалида "Интер" устидан ғалаба қозонганида айнан шу меҳмонхонада қолган эди. Энди эса Франция чемпионлари "Андаз" дизайн-меҳмонхонасига жойлашишга мажбур бўлди.

Парижликлар сешанба куни Мюнхенга етиб келгач, тўғридан-тўғри янги беш юлдузли меҳмонхонага йўл олади. Шундан сўнг стадионда матбуот анжумани ва якуний машғулот ўтказилади.

Nodirbek Razzokov

«ZAMIN.UZ» муҳаррири

+ Zamin.uz сайтини Googleга қўшинг