Дусан Влаҳовиc майдонда ўзининг сермаҳсул ўйинини қайта топган бўлса-да, унинг Ювентусдаги келажаги ҳамон мавҳумлигича қолмоқда. Клуб ва ҳужумчининг вакиллари ўртасида ўтказилган бир неча босқичли музокараларга қарамай, томонлар келишувга эриша олмаяпти. Бу ҳақда Goal.com хабар беради.
Сербиялик футболчи Ҳеллас Верона дарвозасига киритган голи билан узоқ давом этган голли қурғоқчиликка чек қўйди. Бироқ, бу муваффақият клуб раҳбарияти ва футболчи вакиллари ўртасидаги молиявий келишмовчиликларни яшира олмаяпти. Айни дамда томонлар ўртасидаги асосий муаммо маош миқдори эмас, балки агентлик комиссиялари ва шартнома имзолаш учун талаб қилинаётган қўшимча бонуслар бўлиб турибди.
Ла Газзетта делло Спорт хабарига кўра, томонлар шу кунгача беш марта учрашган. Влаҳовиc томони маошни Кенан Йилдиз шартномасига ўхшаш тарзда, яъни йилига 7 миллион еврогача камайтиришга рози бўлган бўлса-да, клуб қўшимча харажатлар бўйича ён беришни истамаяпти.
Ювентус раҳбарияти молиявий барқарорликни сақлаш мақсадида қатъий позицияда турибди. Шартнома муддати тугашига оз вақт қолган бир пайтда, клуб ўз молиявий чегараларидан ташқарига чиқмаслигини маълум қилди. Агар яқин орада келишувга эришилмаса, ёзги трансфер ойнасида ҳужумчининг жамоани тарк этиш эҳтимоли ошади.
“Zamin”ни Telegram'да ўқинг!
