Европа Чемпионлар лигасининг ҳал қилувчи финал баҳси олдидан футбол оламида қизиқ муҳокамалар авж олмоқда. Айниқса, машҳур таҳлил платформалари ва суперкомпютерлар берган прогнозлар мухлислар эътиборини ўзига жалб қиляпти.
Қизиқ жиҳати шундаки, Opta Analyst таҳлилчилари ва суперкомпютер ҳисоб-китобларига кўра, Англиянинг “Арсенал” клуби ушбу мавсумда бош совринни қўлга киритиш учун асосий фаворит сифатида баҳоланмоқда. Лондонликлар имконияти 55,76 фоиз деб кўрсатилган.
Франциянинг “Пари Сен-Жермен” жамоасига эса 44,24 фоизлик эҳтимол берилган. Бу эса финалда кучлар деярли тенг эканини кўрсатади.
Энг қизиғи, агар Микел Артета шогирдлари ғалаба қозонса, “Арсенал” ўз тарихида илк бор Чемпионлар лигаси бош совринини қўлга киритади. Шу сабабли бу финал клуб ва унинг миллионлаб мухлислари учун ҳақиқий тарихий имконият сифатида баҳоланмоқда.
Бу мавсум “канонирлар” Европа аренасида жуда ишончли ҳаракат қилди. Жамоа яримфиналда Испаниянинг тажрибали ва мустаҳкам “Атлетико” клубини мусобақадан чиқариб юборди. Мадриддаги биринчи баҳс 1:1 ҳисобида якунланган бўлса, Лондондаги жавоб учрашувида “Арсенал” минимал ҳисобда ғалаба қозонди.
“ПСЖ” эса финалгача бўлган йўлда Германия гранди — “Бавария”ни таслим қилди. Парижда кечган биринчи учрашув голларга бой ўтиб, 5:4 ҳисобида француз клуби фойдасига ҳал бўлди. Жавоб баҳсида эса 1:1 ҳисоби қайд этилди.
Мутахассислар фикрича, финалда тажриба, босимга чидам ва майда деталлар ҳал қилувчи аҳамият касб этади. Бир томонда Луис Энрике каби катта финалларда ишлаган тажрибали мураббий бўлса, иккинчи томонда ёш ва амбицияли Микел Артета турибди.
Эслатиб ўтамиз, УЕФА Чемпионлар лигаси финали 30 май куни Венгрия пойтахти Будапешт шаҳридаги машҳур “Пушкаш Арена” стадионида бўлиб ўтади. Футбол мухлисларини Европа мавсумининг энг катта ва энг драматик тўқнашувларидан бири кутиб турибди.
“Zamin”ни Telegram'да ўқинг!
