Фулхем бош мураббийи Марко Силва атрофидаги вазият ноаниқлигича қолмоқда. Португалиялик мутахассисга Челси клуби томонидан қизиқиш ортиб бораётган бир пайтда, у ўз келажаги борасида якуний қарорга келгани йўқ. Бу ҳақда Goal.com хабар беради.
Фулхем раҳбарияти ноябрь ойидан буён мураббийга уч йиллик янги шартнома таклиф қилиб келмоқда, бироқ Силва ҳали ҳам ҳужжатларга имзо чекишга шошилмаяпти. Клуб келгуси мавсум учун режа тузишда қийналмоқда ва агар Силва кетишга қарор қилса, муқобил вариантларни кўриб чиқишни бошлаган.
Челси раҳбарияти жамоани барқарорлаштира оладиган мураббий изламоқда ва Силва бу борадаги асосий номзодлардан бири ҳисобланади. Шунингдек, лондонликлар Хаби Алонсо ва Андони Ираола номзодларини ҳам ўрганиб чиқмоқда.
Вазиятни янада мураккаблаштираётган яна бир омил — Бенфика клубининг қизиқиши. Агар Хосе Моуриньо жамоани тарк этса, Португалия гранди айнан Силвани асосий номзод сифатида кўрмоқда.
ДАЗН нашрига берган интервюсида Марко Силва клуб унинг қолишини истаётганини тасдиқлади, бироқ ҳозирги диққат-эътибори мавсум якунидаги ўйинларга қаратилганини таъкидлади. У мавсум якунлангач, ўз келажаги бўйича аниқ қарор қабул қилишини маълум қилди.
“Zamin”ни Telegram'да ўқинг!
