Сам Керрнинг Челси билан амалдаги шартномаси якунига етмоқда. Олти ярим йил давомида 156 та ўйинда майдонга тушиб, 114 та гол урган ва 12 та совринни қўлга киритган афсонавий ҳужумчи учун бу мавсум клубдаги сўнггиси бўлиши мумкин. Гарчи австралиялик футболчи трансфери ҳақидаги миш-мишларни рад этган бўлса-да, томонлар ўртасида янги келишув имзоланмагани унинг жамоани тарк этиш эҳтимолини оширмоқда. Бу ҳақда Goal.com хабар беради.
Жорий мавсум Керр учун осон кечмади. 2024-йил январида олган оғир жароҳати (АКЛ) сабаб узоқ вақт майдондан четда қолган ҳужумчи, сафга қайтганидан сўнг ҳам Сония Бомпасторнинг ротация тизимига мослашишига тўғри келди. Шунга қарамай, у Чемпионлар лигаси ва Англия кубоги доирасидаги муҳим баҳсларда ўзининг юқори савиясини намойиш этишда давом этди.
Олдинда Челси учун мавсумнинг ҳал қилувчи палласи турибди. Якшанба куни жамоа Англия кубоги ярим финалида Манчестер Сити билан тўқнаш келади. Агар бу Керрнинг Челси либосидаги сўнгги ўйинларидан бири бўлса, у ўз фаолиятини яна бир йирик соврин билан якунлаш учун бор кучини ишга солиши шубҳасиз.
“Zamin”ни Telegram'да ўқинг!
