“Реал Мадрид” бош мураббийи Альваро Арбелоа жамоа ичидаги маълумотларнинг оммавий ахборот воситаларига чиқиб кетиши борасида кескин муносабат билдирди. Испаниялик мутахассиснинг фикрича, кийиниш хонасидаги ички гап-сўзлар, можаролар ёки жамоа муҳитига оид маълумотларнинг матбуотга тарқалиши клубга нисбатан хиёнатдек қабул қилинади.
Арбелоа матбуот анжуманида бу ҳолат уни қаттиқ ранжитаётганини очиқ айтди. Унинг таъкидлашича, “Реал Мадрид” каби улкан клубда ички муҳит, футболчилар ўртасидаги муносабат ва кийиниш хонасидаги гаплар жамоанинг ўзида қолиши керак.
— Кийиниш хонасидан маълумотларнинг сизиб чиқиши мен учун “Реал Мадрид”га нисбатан хиёнатдек туюлади. Бу мени жуда хафа қилади. Ким буни қилади? Билмайман. Шунингдек, ҳеч бир футболчини айбламайман, — деди Арбелоа.
Мураббийнинг бу гаплари “Реал” атрофида сўнгги кунларда кучайган турли хабарлар фонида янгради. Аввалроқ жамоа ярим ҳимоячилари Федерико Вальверде ва Орельен Тчуамени ўртасида кийиниш хонасида жанжал юз бергани ҳақида маълумот тарқалган эди. Ушбу воқеа қисқа вақт ичида хорижий оммавий ахборот воситаларида кенг муҳокама қилинди.
Бундай вазият ҳар қандай клуб учун ноқулай, аммо “Реал Мадрид” каби дунё футболида алоҳида мақомга эга жамоа учун бу янада оғир қабул қилинади. Чунки мадридликлардан доим нафақат майдондаги натижа, балки ички интизом, профессионаллик ва клуб обрўсига муносиб муносабат ҳам талаб қилинади.
Арбелоа ҳеч бир футболчини айбламаётганини айтган бўлса-да, унинг сўзларидан клуб ичида бу масала жиддий кўрилаётгани сезилади. Кийиниш хонаси — жамоанинг энг ёпиқ ва ишончли ҳудуди ҳисобланади. У ердаги гаплар ташқарига чиқса, бу нафақат футболчилар ўртасидаги ишончга, балки мураббийлар штаби ва раҳбарият муносабатига ҳам таъсир қилиши мумкин.
Ҳозирги вазият “Реал” учун спорт томондан ҳам осон кечмаяпти. Испания чемпионатининг 34-туридан сўнг мадридликлар 77 очко билан турнир жадвалида иккинчи ўринда бормоқда. Жамоа етакчи “Барселона”дан 11 очко ортда қолган. Бу эса мавсумнинг ҳал қилувчи қисмида босим янада кучайганини англатади.
“Реал” учун эндиликда фақат майдонда натижа кўрсатиш эмас, балки жамоа ичидаги муҳитни ҳам барқарорлаштириш муҳим вазифага айланмоқда. Чунки катта ғалабалар ички бирдамлик, ўзаро ишонч ва тартиб бўлмаса, жуда қийин қўлга киритилади.
Арбелоанинг баёноти эса футболчилар ва клуб атрофидаги барчага аниқ сигнал бўлди: “Реал Мадрид”да ички маълумотларни ташқарига чиқариш оддий ҳолат сифатида қабул қилинмайди. Бу ерда сир ҳам, масъулият ҳам катта. Клуб номи оғир — уни кўтариш учун фақат яхши ўйнаш эмас, жим туришни ҳам билиш керак.
“Zamin”ни Telegram'да ўқинг!
