Ливерпул бош мураббийи Арне Слот шанба куни Челси билан кечган 1:1 ҳисобидаги дуранг ўйиндан сўнг, ёш иқтидор эгаси Рио Нгумоҳани захирага олгани учун мухлислар томонидан билдирилган норозиликларга жавоб қайтарди. Ўйиннинг энг яхши футболчиларидан бири бўлган 17 ёшли вингер алмаштирилганда, трибуналар норозилик билдиришди, бироқ мураббий бу қарор мажбурий бўлганини таъкидлади. Бу ҳақда Goal.com хабар беради.
Арне Слотнинг сўзларига кўра, Рио Нгумоҳа иккинчи бўлимда жисмоний ҳолати билан боғлиқ муаммоларга дуч келган ва ўзи майдонни тарк этишни сўраган. "У жароҳат олмаган, бироқ оёқ мушакларида тортишиш кузатилди. Мен у билан гаплашдим ва у ўйинни давом эттира олмаслигини айтди. Шунинг учун уни алмаштиришга мажбур бўлдим", — деди нидерландиялик мутахассис.
Мураббий мухлисларнинг ҳиссиётларини тушунишини, бироқ жамоа манфаатини ўйлаш кераклигини қўшимча қилди. "Агар мухлислар футболчининг аҳволини билишмаса, бундай қарор уларга ғалати туюлиши табиий. Аммо ўзини 50-60 фоиз ҳолатда ҳис қилаётган ва спринт қила олмайдиган футболчини майдонда қолдириш мантиқсиз эди", — дея тушунтирди Слот.
Ўйин якунида Ливерпул мухлислари натижадан норози бўлиб, жамоани ҳуштакбозлик билан кузатиб қўйишди. Арне Слот бу ҳолатни тўлиқ тушунишини ва Челси каби жамоага қарши ўз уйида дуранг қайд этиш клуб даражасига мос эмаслигини тан олди. "Биз ҳар доим ғалаба учун майдонга тушамиз ва натижа кутганимиздек бўлмаганда, мухлислар каби биз ҳам хафа бўламиз", — дея якунлади мураббий.
“Zamin”ни Telegram'да ўқинг!
