Ливерпул мухлислари учун шанба куни Энфилдда Челси билан дуранг қайд этилгани етмагандек, душанба куни Лондон клуби Хаби Алонсо билан музокараларни бошлагани ҳақидаги хабарлар жамоа ишқибозларини янада тушкунликка солди. Алонсо кўпчилик учун Ливерпул муаммоларига ечим сифатида кўрилаётган эди, чунки у Баер Леверкусен билан мағлубиятсиз мавсумни ўтказиб, ўзини Европанинг энг иқтидорли мураббийларидан бири сифатида намоён этганди. Бу ҳақда Goal.com хабар беради.
Юрген Клопп кетганидан сўнг, айнан Хаби Алонсо мухлисларнинг асосий номзоди эди. Бироқ клуб раҳбарияти Арне Слотга ишонч билдиришда давом этмоқда. Ҳатто Реал Мадрид билан хайрлашганидан сўнг ҳам, испаниялик мутахассис Ливерпулнинг режаларига кирмагани тушунарсиз ҳолат бўлиб қолмоқда.
Арне Слот қўл остидаги Ливерпул сўнгги 71 йилдаги энг ёмон натижаларни қайд этмоқда ва чемпионлик пойгасидан эрта чиқиб кетди. Мухлислар мураббийнинг ўтган мавсумдаги хизматларини ҳурмат қилишса-да, ҳозирги ўйин услуби ва натижалар уларнинг сабрини тугатди. Жамоа ўз майдонида Челси каби инқирозга учраган жамоага қарши ҳам тартибсиз ўйин кўрсатгани вазият нақадар жиддий эканини кўрсатади.
Ўйин давомида Рио Нгумоҳанинг алмаштирилиши мухлисларнинг ғазабини келтирди. Гарчи Слот ёш футболчида мушак тортишиши кузатилганини айтган бўлса-да, мухлислар учун бу қарор жамоанинг умумий инқирози фонида яна бир хато сифатида қабул қилинди. Ливерпул раҳбарияти вазиятни ўнглаш учун зудлик билан чора кўрмаса, мавсум якуни клуб учун янада аянчли бўлиши мумкин.
“Zamin”ни Telegram'да ўқинг!
