“Бенфика” бош мураббийи Жозе Моуринью ўз мураббийлик фаолияти давомида қабул қилган энг қийин қарори ҳақида гапирди. Португалиялик машҳур мутахассис бу саволга жавоб берар экан, фаолиятидаги энг оғир танлов “Интер” клубини тарк этиш бўлганини таъкидлади.
Моуринью футбол оламида ўзининг кескин характери, катта ғалабаларга бўлган иштиёқи ва ҳар қандай жамоага ғолиблик руҳини олиб кира олиши билан танилган. Аммо ҳатто у каби тажрибали мураббий учун ҳам айрим қарорлар осон қабул қилинмаган.
Ундан “Мураббий сифатида қабул қилган энг қийин қарорингиз қайси?” деб сўрашганида, Моуринью қисқа ва аниқ жавоб берди:
— “Интер”дан кетиш.
Португалиялик мутахассисдан бугун ҳам ўша қарорни қабул қилган бўлармидингиз, деб сўралганда, у иккиланмасдан “ҳа” деб жавоб берди. Унинг айтишича, ўша пайтда “Интер” билан тарихий мавсумни ўтказган, жамоа Италия чемпионлиги, Италия кубоги ва Чемпионлар лигасида ғалаба қозонган эди.
— Ҳа, чунки мен ўшанда “Интер” билан ўша мавсумнинг ўзида Скудетто ва Италия кубогини қўлга киритиб, кетидан Чемпионлар лигасида ҳам зафар қучган эдим. Тан олиш керак, жуда қийин бўлган, аммо кейин Мадриднинг “Реал” клубига ўтганман, — дея Моуриньюнинг сўзларини келтиради La Gazzetta dello Sport.
“Интер”даги давр Моуринио фаолиятининг энг ёрқин саҳифаларидан бири ҳисобланади. У Милан клубини нафақат Италияда, балки Европа майдонида ҳам юқори чўққига олиб чиқди. Айниқса, Чемпионлар лигасидаги ғалаба “нерадзурри” мухлислари хотирасида абадий сақланиб қолган.
Маълумот учун, Моуринью бошқарувида “Интер” икки бор Италия А Сериясида ғолиб чиққан. Шунингдек, жамоа Чемпионлар лигаси, Италия кубоги ва Италия Суперкубогида ҳам зафар қучган. Бу натижалар португалиялик мутахассиснинг “Интер” тарихидаги ўрнини янада мустаҳкамлади.
Бироқ катта ғалабалардан кейин ҳам Моуринью янги чақириқни танлади ва Мадриднинг “Реал” клубига йўл олди. Бу қарор профессионал нуқтаи назардан тушунарли бўлса-да, ҳиссий жиҳатдан осон бўлмагани унинг сўзларидан ҳам билиниб турибди.
Футболда баъзан кетиш ҳам ғалаба каби оғир бўлади. Айниқса, сен жамоани тарихий чўққига олиб чиққан бўлсанг. Моуринью учун “Интер”дан кетиш айнан шундай қарор бўлган: юрак бир нарса дейди, карьера эса бошқа йўлни кўрсатади.
“Zamin”ни Telegram'да ўқинг!
