Саудия Арабистонида ўтаётган ўсмирлар ўртасидаги Осиё чемпионатида D гуруҳидан кейинги босқичга йўл олган жамоалар номи маълум бўлди. Ўзбекистон U-17 терма жамоаси Ҳиндистонга қарши баҳсда ишончли 3:0 ҳисобида ғалаба қозониб, плей-офф йўлланмасини нақд қилди.
Ушбу гуруҳда аввал КХДР ҳам иштирок этиши керак эди. Бироқ мазкур жамоа мусобақада қатнашмаслигини маълум қилгач, D гуруҳида Ўзбекистон, Австралия ва Ҳиндистон термалари қолди. 1-турда Австралия Ҳиндистон дарвозасига жавобсиз 4 та гол урганди. Бугун эса амалдаги чемпион Ўзбекистон ҳам ҳиндистонликлардан устун келиб, рақиб дарвозасини уч бор ишғол қилди.
Учрашувнинг 32-дақиқасида Лазиз Абдураимов пенальтидан аниқ зарба бериб, ҳисобни очди. Бу гол ёш футболчиларимизга қўшимча ишонч берди ва ўйин назоратини ўз қўлида ушлаб туриш имконини яратди.
Иккинчи бўлимда ҳам Ўзбекистон термаси босимни сусайтирмади. 60-дақиқада Ҳиндистон футболчиси Сингҳ ўз дарвозасини ишғол қилиб қўйди ва ҳисоб 2:0 кўринишига келди. 78-дақиқада эса Аҳрор Равшанбеков учинчи голни киритиб, баҳс тақдирини узил-кесил ҳал қилди.
Шу тариқа, Ўзбекистон ва Австралия D гуруҳидан плей-оффга чиқишни таъминлади. Энг муҳими, ҳар икки жамоа Қатарда бўлиб ўтадиган кичик мундиалга ҳам йўлланма олди. Бу ёш футболчиларимиз учун жуда катта натижа ва келажак сари муҳим қадам ҳисобланади.
Энди 13 май куни бўлиб ўтадиган 3-турда Ўзбекистон ва Австралия ўзаро тўқнаш келади. Ушбу баҳс гуруҳ ғолибини аниқлаб беради. Ўзбекистон биринчи ўрин билан кейинги босқичга чиқиши учун Австралияни мағлуб этиши керак бўлади.
Осиё кубоги U-17
D гуруҳи. 2-тур
Ҳиндистон — Ўзбекистон 0:3
Голлар: Лазиз Абдураимов, 32, пенальти, Сингҳ, 60, автогол, Аҳрор Равшанбеков, 78.
Ўзбекистон U-17: Олим Шомуродов, Муҳаммадодил Орифхонов, Аҳрор Равшанбеков, Миржамол Анваров, Муҳаммад Ҳакимов, Абубакр Раҳимов, Ислом Равшанов, Адис Абдунабиев, Муҳаммаджон Маматов, Миркомил Муродов, Суҳроб Садиржанов, Жаҳонгирмирзо Ўктамбоев, Лазиз Абдураимов, Рустам Алиев, Амирхон Эркинов, Фаррух Ҳайитмуродов.
Ўзбекистон U-17 терма жамоаси бу ўйинда ўз вазифасини тўлиқ бажарди. Ҳимояда ишончли, ҳужумда самарали ва муҳим паллаларда совуққон ҳаракат қилинди. Энди навбат Австралияга қарши ҳал қилувчи баҳсга. Плей-офф бор, мундиал йўлланмаси бор, энди гуруҳда биринчи ўринни ҳам олиш керак.
“Zamin”ни Telegram'да ўқинг!
