Реал Мадрид ҳимоячиси Ферланд Мендй ўнг сон қисмидаги жароҳати сабаб Лион шаҳрида муваффақиятли жарроҳлик амалиётини бошдан кечирди. Клуб тиббий хизмати назорати остида ўтган операция футболчининг мавсум давомида қийнаган мушак муаммосини бартараф этишга қаратилган. Бу ҳақда Goal.com хабар беради.
Испания матбуотида Мендйнинг фаолиятини якунлаши мумкинлиги ҳақидаги миш-мишлар тарқалган эди, бироқ бу хабарлар рад этилди. Футболчига яқин манбаларнинг таъкидлашича, ҳимоячи майдонга қайтишга қатъий бел боғлаган ва фаолиятини эрта якунлаш ниятида эмас.
Эслатиб ўтамиз, Ферланд Мендй жорий мавсумда бир неча бор жароҳатлар билан тўқнаш келди. Унинг сўнгги жароҳати 3-май куни Эспанёлга қарши ўйинда юз берган ва у атиги 14 дақиқадан сўнг майдонни тарк этишга мажбур бўлганди.
Реал Мадрид расмий баёнотига кўра, операция муваффақиятли ўтган ва футболчи яқин кунларда реабилитация жараёнини бошлайди. Клуб ҳимоячининг бир неча ойдан сўнг яна сафга қайтишини кутмоқда.
“Zamin”ни Telegram'да ўқинг!
