“Барселона”ни қаторасига иккинчи марта Испания чемпионлигига олиб келган германиялик мутахассис Ҳанс-Дитер Флик келажаги борасида якуний қарорга келди. Каталонияликлар бош мураббийи клуб билан ҳамкорликни давом эттиришга рози бўлди.
Журналист Флориан Плеттенберг маълумотига кўра, томонлар янги шартнома бўйича барча асосий шартларни келишиб олган. Янги битим 2028 йил ёзига қадар амал қилади ва яна бир мавсумга узайтириш имкониятини ҳам ўз ичига олади.
Ҳанс-Дитер Фликнинг ўзи ҳам “Барселона”да қолишини шахсан тасдиқлади.
“Мен “Барселона” билан янги шартнома имзолайман”, — деди мураббий.
Айни пайтда мутахассиснинг амалдаги шартномаси 2027 йил ёзигача мўлжалланган. Янги келишув бўйича расмий эълон кейинроқ берилиши кутилмоқда. Аммо асосий масала ҳал бўлган: Флик Каталонияда қолади ва жамоа лойиҳасини давом эттиради.
Бу қарор “Барселона” учун жуда муҳим аҳамиятга эга. Чунки Флик қисқа вақт ичида жамоани тартибга солди, ғолиблик руҳини қайтарди ва “кўк-анорранглилар”ни яна Испания футболидаги асосий кучга айлантирди.
Жорий мавсумда “Барселона” Ла Лига чемпионлигини муддатидан олдин қўлга киритди. Каталонияликлар 91 очко билан турнир жадвалида пешқадам бўлиб турибди. Мадриднинг “Реал” клуби эса 77 очко билан иккинчи ўринни эгаллаган. Чемпионат якунига ҳали уч тур қолган.
Фликнинг жамоада қолиши футболчилар учун ҳам, мухлислар учун ҳам катта ишонч беради. Чунки мураббий атрофида аниқ тизим шаклланди: интизом, юқори прессинг, тезкор ҳужумлар ва ёш футболчиларга ишонч. “Барселона” айнан шу йўналишда янада ўсишни истамоқда.
Германиялик мутахассиснинг кетма-кет икки марта Испания чемпионлигини қўлга киритгани унинг Каталониядаги лойиҳаси тасодиф эмаслигини кўрсатди. Энди клуб олдида янада катта вазифалар турибди — Ла Лигада устунликни сақлаб қолиш ва Европада ҳам катта совринлар учун курашиш.
Қисқаси, “Барселона” ўз ғолиб мураббийини сақлаб қолмоқда. Флик қолади, лойиҳа давом этади, рақиблар эса тайёр турсин — Каталонияда “иккинчи мавсум синдроми” эмас, “яна давом этамиз” режими ёқилган.
“Zamin”ни Telegram'да ўқинг!
