42 ёшли ҳужумчи Себастиан Сориа 2026-йилги Жаҳон чемпионатида тарихий натижани қайд этиш арафасида. Жулен Лопетегуи бошчилигидаги Қатар терма жамоасининг дастлабки таркибига киритилган фахрий футболчи, агар якуний рўйхатдан жой олса, Камерун афсонаси Рогер Милла ўрнатган рекордни янгилаши мумкин. Милла 1994-йилги мундиалда 42 ёшида майдонга тушиб, энг кекса майдон ўйинчиси сифатида тарихга кирганди. Бу ҳақда Goal.com хабар беради.
Сориа ушбу ютуғи билан нафақат ўз мамлакати учун, балки бутун футбол олами учун ибрат бўлмоқда. Бироқ, мутлақ рекорд ҳали ҳам мисрлик дарвозабон Эссам Эл Ҳадарйга тегишли бўлиб, у 2018-йилда 45 ёшида мундиалда иштирок этган. Сорианинг бу ёши футболчиларнинг профессионал фаолиятини узайтириш борасидаги имкониятларини яна бир бор кўрсатиб берди.
Ушбу ҳолат Криштиано Роналдо учун ҳам янги мақсадларни белгилаб бериши мумкин. Ал-Насср юлдузи 2026-йилги турнир якунида 41 ёшга тўлади. Агар Сориа 42 ёшида мундиалда ўйнай олса, бу Криштиано Роналдо учун 2030-йилги Жаҳон чемпионатида 45 ёшида майдонга тушиб, барча рекордларни янгилаш учун кучли мотивация бўлиши шубҳасиз.
Ҳозирда 971 та гол муаллифи бўлган Криштиано Роналдо 1000 та гол маррасини забт этиш ва халқаро майдондаги муваффақиятларини бойитишни мақсад қилган. У Португалия терма жамоаси сафида Жаҳон чемпионати кубогини боши узра кўтариш орқали ўзининг шонли фаолиятига муносиб якун ясашни истайди.
“Zamin”ни Telegram'да ўқинг!
