Испания футболида “Барселона” ва “Реал Мадрид” ўртасидаги рақобат яна майдон ташқарисида ҳам қизғин тус олмоқда. Бу сафар каталонияликлар “Реал Мадрид” президенти Флорентино Переснинг сўнгги баёнотларига расмий муносабат билдирди.
“Барселона” клуби ўз расмий сайти орқали эълон қилган баёнотида Перес томонидан айтилган фикрлар ва айбловлар ҳозирда клубнинг юридик бўлими томонидан диққат билан ўрганилаётганини маълум қилди. Каталонияликлар масалага шошма-шошарлик билан эмас, ҳуқуқий жиҳатдан пухта ёндашишни мақсад қилганини билдирмоқда.
Аввалроқ Флорентино Перес матбуот анжуманида “Барселона” ва ҳакамлар техник қўмитасининг собиқ вице-президенти Хосе Мария Негрейра ўртасидаги алоқалар ҳақида гапирган эди. “Реал” раҳбари ушбу ҳамкорликда коррупцион ҳолатлар бўлганини таъкидлаб, бу ишга оид тегишли ҳужжатлар УЕФАга тақдим этилишини айтган.
Бу баёнот Испания футболида яна катта шов-шув уйғотди. Чунки “Негрейра иши” атрофидаги баҳслар аввалдан ҳам “Барселона” имижига босим ўтказиб келаётган эди. Энди эса “Реал Мадрид” президентининг очиқ айбловлари вазиятни янада жиддийлаштирди.
“Флорентино Перес чақирган матбуот анжумани муносабати билан шуни маълум қиламизки, клубимизнинг юридик бўлими унинг баёнотлари ва айбловларини диққат билан ўрганмоқда. Ҳозирда улар таҳлил қилинмоқда ва кейинги қадамлар баҳоланяпти. Ўз позициямизни ва қабул қилиниши мумкин бўлган қарорлар ҳақида тегишли вақтда қўшимча маълумот берамиз”, — дейилади “Барселона” баёнотида.
Каталония клубининг бу жавоби анча эҳтиёткор, аммо жиддий руҳда берилган. Яъни “Барселона” ҳозирча кескин баёнотлар билан чиқмаяпти, бироқ Переснинг сўзларини эътиборсиз қолдирмаслигини ҳам очиқ кўрсатди. Ҳуқуқий бўлим таҳлилни якунлагач, клуб кейинги қадамларини белгилаши кутилмоқда.
Бу вазият “Эл-Класико” рақобати фақат майдондаги голлар, ғалабалар ва совринлар билан чекланмаслигини яна бир бор исботлади. “Реал” ва “Барселона” ўртасидаги ҳар бир баёнот ҳам катта футбол воқеасига айланади. Бу сафар эса гап обрў, ҳуқуқий позиция ва халқаро футбол ташкилотлари даражасидаги баҳолаш ҳақида кетмоқда.
Қисқаси, Испания футболида яна “катта серия” бошланди. Майдонда тўп ҳали тепилмасидан, баёнотлар ўзиёқ ўйинни қиздириб юборди. Энди мухлислар “Барселона”нинг кейинги расмий қадами қандай бўлишини кутишмоқда.
“Zamin”ни Telegram'да ўқинг!
