«Реал Мадрид» ҳужумчиси Килиан Мбаппе футбол олами афсоналаридан бири Криштиану Роналду билан муносабатлари ҳақида самимий фикр билдирди. Франциялик юлдузнинг сўзларига кўра, болаликдан ўзига намуна деб билган футболчи бугун унинг яқин дўстига айланган.
Мбаппе VENITE FAIR нашрига берган интервьюсида Роналду билан тез-тез мулоқот қилиб туришини айтди. Унинг таъкидлашича, португалиялик юлдуз «Реал»даги илк йилида унга катта ёрдам берган. Бу эса Мбаппе учун нафақат спорт, балки шахсий жиҳатдан ҳам муҳим қўллаб-қувватлаш бўлган.
«Криштиану энди менинг дўстим. Мен кумирим бўлган инсоннинг дўстимга айланиши жуда ажойиб. Биз кўп мулоқот қиламиз, у «Реал»даги биринчи йилимда менга кўп ёрдам берди. Муносабатларимиз жуда яхши», — деди Мбаппе.
Бу сўзлар футбол мухлислари учун алоҳида қизиқарли. Чунки Криштиану Роналду узоқ йиллар давомида «Реал Мадрид» рамзларидан бирига айланган, клуб тарихида ўчмас из қолдирган футболчи ҳисобланади. Мбаппе эса айнан шу клубда янги давр юлдузи сифатида катта умидлар билан ҳаракат қилмоқда.
Франциялик ҳужумчи 2024 йилда «ПСЖ»дан эркин агент сифатида «Реал» сафига келиб қўшилган эди. Унинг Мадрид клуби билан амалдаги шартномаси 2029 йил ёзига қадар мўлжалланган. Демак, Мбаппе олдида «қаймоқранглилар» сафида катта тарих ёзиш учун ҳали етарли вақт бор.
Бу мавсумда Килиан Мбаппе «Реал» таркибида барча турнирларда 41 та учрашувда майдонга тушиб, 41 та гол урди ва 6 та голли узатмани амалга оширди. Бу рақамлар унинг Мадриддаги мослашуви жуда юқори даражада кечаётганини кўрсатади.
Роналдунинг маслаҳатлари ва маънавий қўллаб-қувватлаши Мбаппе учун қўшимча куч бўлаётгани аниқ. Ахир ўзи орзу қилган клубга келиб, ўша клуб афсонасидан йўл-йўриқ олиш ҳар бир футболчи учун катта мотивация бўлади.
Қисқаси, Мбаппе ва Роналду ўртасидаги муносабат футболда авлодлар алмашинувининг чиройли кўринишига ўхшайди. Бир давр афсонаси иккинчи давр юлдузига маслаҳат бермоқда. Мухлислар эса энди Мбаппедан «Реал»да янада катта голлар, ҳал қилувчи ўйинлар ва тарихий лаҳзалар кутишмоқда.
“Zamin”ни Telegram'да ўқинг!
