Англия чемпионлиги учун курашаётган “Манчестер Сити” Премьер-лиганинг 31-туридан қолдирилган муҳим учрашувида ўз майдонида “Кристал Пэлас”ни қабул қилиб, 3:0 ҳисобида ишончли ғалаба қозонди. Бу натижа “шаҳарликлар” учун чемпионлик пойгасида жуда муҳим бўлди, чунки жамоа пешқадам “Арсенал” билан орадаги фарқни янада қисқартиришда давом этмоқда.
Ўзбекистонлик мухлислар учун энг қувонарли жиҳат эса Абдуқодир Ҳусановнинг бошланғич таркибда майдонга тушиб, учрашувни тўлиқ ўтказгани бўлди. Кичик жароҳат сабаб аввалги турда иштирок этмаган ҳимоячимиз бу сафар “Сити” мудофаасида хотиржам, ишончли ва жуда тартибли ҳаракат қилди.
Нуфузли cityxtra.co.uk сайти экспертлари “Манчестер Сити” футболчиларининг “Кристал Пэлас”га қарши ўйиндаги ҳаракатларини баҳолади. Абдуқодир Ҳусанов 7,5 балл олди ва жамоанинг энг яхши баҳоланган футболчилари қаторидан жой олди.
Манба таъкидлашича, Ҳусановнинг “Брентфорд”га қарши ўйинни ўтказиб юборишига сабаб бўлган жисмоний ноқулайлик бу галги баҳсда деярли сезилмади. Аксинча, ўзбекистонлик ҳимоячи Марк Геҳи ва бошқа шериклари билан бирга “Пэлас” ҳужумларини бошиданоқ нейтраллаштирди. Рақибнинг узатмалари вақтида тўхтатилди, хавфли ҳудудлар ёпилди ва “Сити” ўйинни ортиқча хавотирсиз назорат қилди.
Жанлуижи Доннарумма 7 балл билан баҳоланди. У Матетанинг яқин масофадан берган зарбасини қайтарди, гарчи кейин бу вазият офсайд деб топилган бўлса ҳам. Шунингдек, Митчелл зарбасидан кейин ҳам дарвозабон ақлли сейв кўрсатди. Бир вазиятда унинг хатоси пенальтига сабаб бўлиши мумкин эди, аммо эпизод мезбонлар фойдасига ҳал қилинди.
Матеуш Нуньеш ҳам 7 балл олди. Ярим ҳимоядаги муаммоларни ҳисобга олганда, у ҳимоя чизиғида позицияни сақлаш ва жамоа ўйинини қўллаб-қувватлаш учун катта меҳнат қилди. Бир соатдан сўнг унинг алмаштирилиши ҳам Гвардиола учун у қанчалик муҳим футболчига айланганини кўрсатди.
Марк Геҳи 7 балл билан баҳоланди. У собиқ жамоаси ҳужумларидан катта босим ҳис қилмади ва орқа чизиқдан ҳужумларни ишонч билан бошлаб берди. Йошко Гвардиол ҳам 7 балл олди. Узоқ жароҳатдан қайтган футболчи жисмонан оғир позицияда ўйнаганига қарамай, югуриш ва қарор қабул қилишда ишончли кўринди.
Бернарду Силва 8 баллга муносиб деб топилди. “Манчестер Сити”даги фаолияти якунига яқинлашаётган бўлса ҳам, у яна янги қирраларини кўрсатди. Бу сафар Бернарду ягона таянч ярим ҳимоячи сифатида ҳаракат қилди ва айрим хатарли узатмани ҳисобга олмаганда, ўз вазифасини одатдагидек профессионал даражада бажарди.
Учрашувнинг энг юқори баҳоларидан бири Фил Фоденга берилди — 8,5 балл. Ярим ҳимоядаги етишмовчилик сабаб у марказда кўпроқ тўп билан ҳаракат қилди ва бу имкониятдан унумли фойдаланди. Фоден вазиятлар яратди, рақибни финтлар билан қийнади ва иккита голли узатма амалга оширди.
Савио 7,5 балл олди. Биринчи бўлимда баъзи қарорларидан ўзи ҳам рози эмасдек кўринган бўлса-да, кейинроқ ўйинга яхши киришиб кетди. У ўнг қанотни фаол назорат қилди ва гол уриш орқали мухлислар ундан кутаётган асосий сифатни кўрсатди.
Антуан Семеньо ҳам 7,5 балл билан баҳоланди. Унга таянч ярим ҳимоячи ва пас тарқатувчи роли мос тушгани кўринди. Футболчи ўйинда тез гол уриб, “Сити”га керакли устунликни берди.
Райан Аит-Нури 7 балл олди. Одатда чап қанот ҳимоячиси сифатида ўйнайдиган футболчи бу сафар ҳужум чизиғида ҳаракат қилди. У қанотда фаоллик кўрсатиш ва “Пэлас” мудофаасига босим ўтказиш учун анча меҳнат қилди.
Умар Мармуш 7,5 балл билан баҳоланди. У Эрлинг Ҳоланд ролини деярли мукаммал бажарди: кўп ҳолларда кўринмасдек ҳаракат қилди, аммо керакли паллада ўйинга қўшилди ва чиройли гол урди.
Захирадан майдонга тушган футболчилар орасида Райан Шерки алоҳида тилга олинди. У 7 балл олди ва Савио учун деярли йўқ жойдан голли вазият яратиб берди. Натан Аке 6,5, Матео Ковачич 6,5, Жереми Доку эса 6 балл билан баҳоланди.
Қисқаси, “Манчестер Сити” яна бир бор ўз вазифасини профессионалларча бажарди. Фоден ижодкорликни таъминлади, Савио ва Мармуш голлар билан ажралиб турди, Бернарду марказда барқарорлик берди. Абдуқодир Ҳусанов эса жароҳатдан кейинги қайтишида ҳимояда ишонч, хотиржамлик ва катта салоҳият борлигини яна бир бор исботлади. Ўзбек мухлислари учун энг ширин жойи ҳам шу — Ҳусанов энди “Сити” ҳимоясида шунчаки ном эмас, ишончли кучга айланиб бормоқда.
“Zamin”ни Telegram'да ўқинг!
