РБ Лейпциг иқтидорли ҳужумчиси Ян Диоманде атрофидаги трансфер миш-мишлари тобора кучаймоқда. Узоқ вақт давомида футболчига Бавария ва Ливерпул қизиқиш билдираётгани ҳақида хабарлар тарқалган бўлса-да, 19 ёшли ивуарлик футболчининг ўзи бошқа номларни тилга олди. Бу ҳақда Goal.com хабар беради.
Матбуот анжуманида сўзга чиққан Диоманде: "Тасаввур қилинг, одамлар сизни Челси ёки Реал Мадрид сафига ўтишингизни айтишмоқда. Бу ҳар қандай футболчини хурсанд қилади ва янада кўпроқ мотивация беради", — дея таъкидлади. Ёш юлдуз ўзига билдирилаётган эътибордан мамнун эканлигини яширмади.
Ўтган ёзда КД Леганес клубидан 20 миллион евро эвазига харид қилинган Диоманде жорий мавсумда 35 та ўйинда 13 та гол уриб, 9 та голли узатмани амалга оширди. Ушбу статистик кўрсаткичлар PSJ ва Манчестер Сити каби гранд клубларнинг ҳам эътиборини тортди.
РБ Лейпциг раҳбарияти эса ўз юлдузини сотиш ниятида эмас. Клуб вакили Оливер Минтзлафф агар спорт директори бўлганида, қанча таклиф бўлишидан қатъи назар, бу ёш футболчини қўйиб юбормаслигини маълум қилди. Бавария эса трансфер нархи 100 миллион евродан ошиб кетиши мумкинлиги сабабли, муқобил вариант сифатида Энтони Гордон номзодига тўхталди.
“Zamin”ни Telegram'да ўқинг!
