Вилла Паркда Астон Вилла жамоасига қарши кечган баҳсда 4:2 ҳисобида мағлубиятга учраган Ливерпул бош мураббийи Арне Слот жамоасининг ҳимоядаги хатоларидан норозилигини яширмади. Бу мағлубият мерсисайдликлар учун жорий мавсумдаги 20-си бўлди ва жамоанинг Чемпионлар лигасига йўлланма олиш имкониятларини кескин пасайтириб юборди. Бу ҳақда Goal.com хабар беради.
Голландиялик мутахассис ўйиннинг иккинчи бўлимида жамоаси руҳий жиҳатдан синиб қолганини тан олди. Унинг сўзларига кўра, ҳисоб 2:1 кўринишига келгач, футболчилар назоратни йўқотишди ва рақибга жуда осон имкониятлар тақдим этишди. Арне Слот жамоаси нафақат кўп гол ўтказиб юбораётгани, балки ҳужум чизиғида ҳам етарлича самарадорлик кўрсата олмаётганини таъкидлади.
Статистик маълумотларга кўра, Ливерпул жорий мавсумда Англия Премер-лигасида 50 тадан ортиқ гол ўтказиб юборди, бу клуб тарихидаги энг ёмон кўрсаткичлардан бири ҳисобланади. Айниқса, стандарт вазиятлардаги ҳимоявий заифлик ва сафар ўйинларидаги муваффақиятсизликлар жамоанинг мавсум давомидаги асосий муаммосига айланди.
Мухлисларнинг норозилигига қарамай, Арне Слот истеъфога чиқиш нияти йўқлигини ва келаси мавсумда ҳам жамоани бошқаришига ишончи комил эканлигини билдирди. Ливерпул энди мавсумнинг сўнгги турида Брентфордга қарши майдонга тушади ва Чемпионлар лигаси учун курашни давом эттиришга уриниб кўради.
“Zamin”ни Telegram'да ўқинг!
