Манчестер Юнайтед жамоасининг собиқ ҳужумчиси Тедди Шерингем Ливерпул раҳбариятининг Арне Слот билан хайрлашиш ҳақидаги қарорини тўғри деб ҳисоблайди. Унинг фикрича, жамоада юзага келган салбий муҳит клуб келажагига жиддий хавф туғдираётган эди. Шерингем агар нидерландиялик мутахассис ўз лавозимида қолса, вазият янада ёмонлашиши ва навбатдаги мавсум ҳам бой берилиши мумкинлигидан огоҳлантирган. Бу ҳақда Goal.com хабар беради.
Ливерпул учун 2025-26-йилги мавсум омадсиз якунланди ва жамоа Англия Премер-лигаси турнир жадвалида бешинчи ўринни эгаллади. Кутилган натижаларга эриша олмаган клуб раҳбарияти янги йўналишни танлашга қарор қилди. Шерингемнинг таъкидлашича, мураббийга бўлган ишонч йўқолган бир пайтда уни жамоада олиб қолиш мантиқсиз ва бу клуб атрофида "заҳарли муҳит" шаклланишига сабаб бўлган.
"Ливерпул каби катта клуб мавсумни бундай ноаниқлик билан бошламаслиги керак. Агар дастлабки 12 та турдан сўнг пешқадамдан 10 очко ортда қолсангиз, нима қиласиз? Бу шунчаки вақтни бой бериш бўларди. Слот бошқарувида вазият фақат ёмонлашиб борарди, шунинг учун ўзгариш қилиш шарт эди", — дея қўшимча қилди собиқ футболчи.
Шунингдек, Шерингем Ливерпулнинг трансфер бозоридаги ҳаракатларини ҳам танқид қилди. Хусусан, жамоанинг асосий нишони бўлган Хаби Алонсо Челси клубига ўтиб кетгани мухлислар учун кутилмаган зарба бўлди. Экспертнинг фикрича, клуб раҳбарияти Слотнинг келажаги борасида тезроқ қарор қабул қилиб, Алонсо бўш бўлган вақтда уни қўлга киритиши лозим эди.
“Zamin”ни Telegram'да ўқинг!
