Англия футболи афсонаси Гари Невилл “Челси” клубининг Хаби Алонсони бош мураббий этиб тайинлаши ҳақида ўз фикрларини билдирди. Якшанба куни лондонликлар испаниялик мутахассис билан расмий шартнома имзоланганини маълум қилган эди.
Алонсонинг “Челси”га келиши оддий мураббий алмашинуви сифатида эмас, балки клубда янги бошқарув даври бошланиши сифатида баҳоланмоқда. Чунки испаниялик мутахассис фақат майдондаги тактика ёки таркиб танлови билан чекланмайди. У клубда футбол сиёсати, трансфер қарорлари ва умумий спорт йўналишига ҳам таъсир кўрсатадиган менежер сифатида кўрилмоқда.
Гари Невиллнинг фикрича, Хаби Алонсо “Челси”га келишидан аввал клуб раҳбариятига ўз талабларини аниқ билдирган. У жамоада ким қолиши, ким кетиши, қайси йўналишда иш олиб борилиши кераклигини очиқ айтган бўлиши мумкин.
“Менимча, Алонсо клубга ким кетиши, ким қолиши кераклигини очиқ айтган. У назорат ва ишончни ҳис қилишни хоҳлайди”, — деди Невилл ўз подкастида.
Невиллнинг таъкидлашича, Алонсо биринчи кунданоқ ўз ғояларини ҳимоя қилишга киришган. У клуб раҳбариятига нима учун айнан унинг режаси асосида ишлаш кераклигини тушунтирган ва ўз лойиҳасига ишонч уйғота олган.
“Ўйлашимча, у биринчи кунданоқ ўз қарашларини ҳимоя қилишни бошлаган ва нима учун айнан унинг режаси бўйича ишлаш кераклигини тушунтирган. Шу сабабли ҳам уни оддий бош мураббий эмас, айнан менежер сифатида тайинлашди”, — дея қўшимча қилди у.
Бу фикрлар “Челси”да Алонсога катта ваколат берилганини англатиши мумкин. Лондон клуби сўнгги йилларда кўплаб мураббийлар алмашинуви, таркибдаги беқарорлик ва натижалардаги пасайиш билан тўқнаш келганди. Шу сабабли клуб раҳбарияти бу сафар узоқ муддатли ва аниқ режага асосланган йўлни танлаётгани кўринмоқда.
Хаби Алонсо эса замонавий футболда янги авлод мураббийларидан бири сифатида тилга олинмоқда. У тактик билим, жамоа қуриш қобилияти ва футболчилар билан ишлаш маданияти орқали катта эътибор қозонган. “Челси” каби босим юқори бўлган клубда эса бу сифатлар жуда муҳим аҳамият касб этади.
Эслатиб ўтамиз, Хаби Алонсо “Челси” билан 2030 йилгача мўлжалланган шартнома имзолаган. Бу келишув клубнинг унга қисқа муддатли натижа эмас, балки узоқ муддатли лойиҳа сифатида қараётганини кўрсатади.
Қисқаси, Гари Невилл Алонсо “Челси”да оддий мураббий эмас, катта ваколатга эга менежер сифатида иш бошлаганини таъкидлади. Энди испаниялик мутахассис учун асосий вазифа — гапни режада эмас, майдонда исботлаш. Лондонда сабр кам, талаб эса доим баланд.
“Zamin”ни Telegram'да ўқинг!
