Сантос юлдузи Неймар 2026-йилги жаҳон чемпионатида Бразилия терма жамоаси сафида майдонга тушиш ниятида эканлигини яна бир бор таъкидлади. Ҳужумчи айни дамда терма жамоага чақирув олишни интиқлик билан кутмоқда. Бу ҳақда Goal.com хабар беради.
Яқинда ўтказилган ўйиндан сўнг Неймар кийиб чиққан сариқ-яшил рангли куртка мухлислар ўртасида турли миш-мишларга сабаб бўлди. Бироқ футболчи бу кийим шунчаки Девид Бекхемнинг ўғли Ромео Бекхем томонидан совға қилинганини ва унда ҳеч қандай яширин маъно йўқлигини тушунтирди.
Неймар жароҳатлардан кейинги тикланиш жараёни жуда оғир кечганини тан олди. Унинг сўзларига кўра, айнан жаҳон чемпионатида иштирок этиш орзуси унга қийинчиликларни енгиб ўтишда асосий мотивация бўлиб хизмат қилган.
Бразилия терма жамоасининг энг яхши тўпурари бўлган футболчи ўзининг жисмоний ҳолати борасидаги танқидларга ҳам жавоб қайтарди. У ҳар бир ўйин билан ўз формасини яхшилаб бораётганини ва майдонда яна ўз ритмини топаётганини таъкидлади.
“Zamin”ни Telegram'да ўқинг!
