Бразилия терма жамоаси ҳужумчиси Неймар Сантос ва Коритиба ўртасидаги учрашув олдидан миллий мадҳия янграётган вақтда ўзини тута олмай, кўз ёш тўкди. Ушбу ҳолат футболчининг 2026-йилги Жаҳон чемпионати учун эълон қилинадиган таркибга кириш борасидаги катта босим остида эканини яққол кўрсатди. Бу ҳақда Goal.com хабар беради.
Вила Белмиро стадионида қизи билан бирга майдонга тушган 34 ёшли футболчи учун бу лаҳзалар жуда таъсирли кечди. Узоқ давом этган жароҳатлар ва фаолиятидаги қийинчиликлардан сўнг, Неймар ўзининг она клуби Сантосга қайтиб, яна катта футболга қайтишга муваффақ бўлди.
Бош мураббий Карло Анселотти душанба куни Бразилия терма жамоасининг 26 кишилик якуний таркибини эълон қилади. Неймар 55 кишилик дастлабки рўйхатга киритилган бўлса-да, унинг якуний таркибдан жой олиши ҳали ҳам сўроқ остида қолмоқда.
Эслатиб ўтамиз, Неймар 2023-йил октябрь ойида тиззасидаги жиддий жароҳат сабаб узоқ вақт майдондан четда қолган эди. Бироқ 2025-йил бошида Сантосга қайтиши унинг фаолиятида янги саҳифа очди ва у яна терма жамоа даражасидаги ўйинларини намойиш эта бошлади.
“Zamin”ни Telegram'да ўқинг!
