Бразилиялик юлдуз Неймар халқаро майдонга қайтишнинг ҳиссий юки ҳақида очиқ гапирди ва 2026-йилги Жаҳон чемпионати учун Бразилия терма жамоаси қайдномасига киритилганидан сўнг соатлаб йиғлаганини тан олди. Сантос юлдузи узоқ давом этган жиддий жароҳатдан сўнг Карло Анселотти режаларидан жой олиш учун машаққатли йўлни босиб ўтди. Бу ҳақда Goal.com хабар беради.
Анселотти томонидан эълон қилинган якуний рўйхатдан жой олганидан сўнг, Неймар Сантос ТВ телеканалига берган интервюсида ўз ҳис-туйғуларини ижор қилди. 2023-йилнинг октябрь ойида олган оғир жароҳати туфайли узоқ вақт майдонга туша олмаган 10-рақам соҳиби, бу хабар унинг учун катта енгиллик ва тикланиш йўлидаги меҳнатларининг самараси бўлганини таъкидлади.
"Мен бир неча соат давомида йиғладим, бу даражага етиш осон бўлмади. Исмим эълон қилинганидан кейин барча қийинчиликларни енгиб ўтишга, бор кучимни сарфлашга арзиганини тушундим", — деди Барселона ва Пари Сен-Жермен клубларининг собиқ юлдузи. Ўзи тарбия топган клубга қайтган Неймар, Сантосдаги муҳит унинг юқори даражага қайтишида ҳал қилувчи рол ўйнаганини алоҳида қайд этди.
Неймар Реи Пеле ўқув-машғулот марказида олган қўллаб-қувватлови унинг терма жамоага қайтиш орзуси учун калит бўлганини ҳис қилмоқда. "Бу ерда ўзимни худди уйдагидек ҳис қиляпман. Буни тушунтириб бериш қийин. Мен барчага раҳмат айтмоқчиман. Бу чақирув нафақат мен учун, балки ушбу жараённинг бир қисми бўлган, майдонда ва унинг ташқарисида мен билан бирга бўлган ҳар бир инсон учун", — дея қўшимча қилди у.
Ўзининг юксак мақоми ва терма жамоадаги бой тарихига қарамай, Неймар 2026-йилги Жаҳон чемпионатида асосий таркибдан жой олиш кафолатланмаганини яхши билади. Карло Анселотти футболчининг ўтмишдаги хизматлари унга имтиёз бермаслигини ва АҚШдаги тайёргарлик жараёнида рақобат кучли бўлишини аниқ тушунтириб қўйган. Шунга қарамай, Неймар оптимистик руҳда ва бор эътиборини жамоа бирлигига қаратган.
“Zamin”ни Telegram'да ўқинг!
