Ханси Флик Эз Абдени Барселонага қайтармоқчи

Барселона клуби чап қанот ҳужумчиси позициясини кучайтириш мақсадида Real Betis футболчиси Эз Абде трансферини кўриб чиқмоқда. Кадена SEР хабарига кўра, жамоа бош мураббийи Ханси Флик марокашлик футболчининг ўйинидан жуда таассурот олган. Бу ҳақда Goal.com хабар беради.

Ханси Флик якшанба куни бўлиб ўтган ўзаро баҳсда 24 ёшли вингернинг ҳаракатларини яқиндан кузатди. Абде айниқса биринчи бўлимда фаол ҳаракат қилиб, Барселона ҳимоячиси Жулес Коунде учун жиддий муаммолар туғдирди. Учрашув давомида Абде гол уришга ҳам муваффақ бўлди, бироқ ҳакамлар офсайд сабабли голни бекор қилишди.

Эслатиб ўтамиз, Эз Абде 2021-йилдан 2023-йилгача Барселона таркибида бўлган, бироқ асосий таркибдан жой ололмагач, Real Betisга ўтиб кетганди. Каталонияликлар футболчининг шартномасида уни қайтариб сотиб олиш ҳуқуқини сақлаб қолишган, бу эса ёзги трансфер ойнасида битимни амалга оширишни осонлаштириши мумкин.

Ҳозирги вақтда футболчининг келажаги борасида турли хил фикрлар мавжуд. Абде Барселонада захира ўйинчиси бўлишга рози бўладими ёки йўқ, бу ҳозирча номаълум. Шунингдек, унга Англия Премер-лигасининг бир қатор клублари ҳам қизиқиш билдирмоқда.