Европа футболида ёзги трансфер ойнаси яқинлашгани сари катта клублар янги режалар тузишни бошлади. Ўз олдига юқори мақсадларни қўйган “Арсенал” ва “Ювентус” “Манчестер Сити” ярим ҳимоячиси Тижани Рейндерсни ўз сафига қўшиб олиш имкониятини кўриб чиқмоқда.
TEAMtalk хабарига кўра, 27 ёшли нидерландиялик футболчига нафақат “Арсенал” ва “Ювентус”, балки Англия Премьер-лигасининг яна икки клуби — “Астон Вилла” ҳамда “Ньюкасл Юнайтед” ҳам қизиқиш билдирмоқда. Бу эса Рейндерс атрофидаги рақобат жиддий тус олаётганини кўрсатади.
Рейндерс “Манчестер Сити” сафида ўзини универсал, ҳаракатчан ва ҳужумга фаол қўшила оладиган ярим ҳимоячи сифатида намоён қилмоқда. У марказда тўп билан ишлаш, ўйин суръатини ушлаш, ҳужумни давом эттириш ва керакли пайтда жарима майдонига кириб бориш қобилияти билан ажралиб туради. Бундай футболчилар бугунги замонавий футболда ҳар қандай мураббий учун “керакли файл” ҳисобланади.
Манба маълумотига кўра, “шаҳарликлар” Рейндерс учун 45 миллион фунт, яъни тахминан 52,2 миллион евро миқдорида таклиф тушса, уни сотиш вариантини кўриб чиқиши мумкин. Бу нарх бозор шароитида жуда мантиқий кўринади, чунки футболчининг Transfermarkt порталидаги баҳоси 60 миллион еврони ташкил этади.
“Арсенал” учун Рейндерс марказий чизиққа қўшимча энергия, техник маҳорат ва универсаллик олиб кириши мумкин. Микел Артета жамоасида ярим ҳимоядан ҳужумга тез ўтиш, прессинг ва тўп назорати муҳим ўрин тутади. Рейндерс эса айнан шундай услубга мос футболчилардан бири сифатида кўринмоқда.
“Ювентус” эса сўнгги йилларда таркибни қайта қуриш жараёнини бошдан кечирмоқда. Туринликлар марказий чизиққа сифатли, тажрибали ва бир вақтнинг ўзида ҳали ўсиш имконияти бор футболчи қўшишни истайди. Рейндерс Италия футболида ҳам ўзини кўрсата оладиган даражадаги ярим ҳимоячи сифатида баҳоланмоқда.
“Астон Вилла” ва “Ньюкасл Юнайтед”нинг қизиқиши ҳам бежиз эмас. Ҳар икки клуб Европада ўз ўрнини мустаҳкамлаш, таркибни чуқурлаштириш ва катта рақобатга тайёр туришни мақсад қилган. Рейндерс каби футболчи уларга марказда сифат ва тажриба қўшиши мумкин.
Агар нидерландиялик футболчи “Манчестер Сити”ни тарк этса, клуб мутасаддилари унинг ўрнига “Ноттингем Форест” ярим ҳимоячиси Эллиот Андерсонни сотиб олиш вариантини кўриб чиқади. Бу эса “Сити” раҳбарияти Рейндерс бўйича эҳтимолий трансферга олдиндан тайёргарлик кўраётганидан дарак беради.
Жорий мавсумда Тижани Рейндерс барча мусобақаларда 46 та учрашувда майдонга тушди. У 7 та гол ва 8 та голли узатмага муаллифлик қилди. Ярим ҳимоячи учун бундай статистика анча салмоқли ҳисобланади. Бу унинг фақат ҳимоя ва тўп назорати билан чекланмасдан, ҳужум натижадорлигига ҳам таъсир кўрсата олишини исботлайди.
Футболчининг “Манчестер Сити” билан амалдаги шартномаси 2030 йил ёзигача мўлжалланган. Шу сабаб уни олиб кетиш осон бўлмайди. Аммо катта клублар қизиқиши ва “Сити”нинг маълум суммада таклифларни кўриб чиқишга тайёрлиги трансфер интригасини янада кучайтирмоқда.
Қисқаси, Тижани Рейндерс ёзги трансфер бозорида энг қизиқ номлардан бирига айланиши мумкин. “Арсенал”, “Ювентус”, “Астон Вилла” ва “Ньюкасл” уни кузатмоқда, “Манчестер Сити” эса керакли сумма тушса, қарор қабул қилишга тайёр кўринади. Энди ҳаммаси таклифлар, футболчининг истаги ва “шаҳарликлар” режасига боғлиқ. Футбол бозори қизий бошлади, попкорн режимини ёқса бўлади.
“Zamin”ни Telegram'да ўқинг!
