Германия кубоги финали қаҳрамони Гарри Кейн "Бавария" билан шартномани узайтириш бўйича музокаралар ҳали якуний босқичга етмаганини таъкидлади. Мюнхенликларнинг "Штутгарт" устидан қозонилган 3:0 ҳисобидаги ғалабасида хет-трик қайд этган ҳужумчи ўзининг келажаги борасидаги режалари билан ўртоқлашди. Ҳозирги келишуви 2027-йилгача амал қиладиган 32 ёшли футболчи фаолиятидаги сўнгги йирик шартномалардан бирини имзолаш арафасида эканини яширмади. Бу ҳақда Goal.com хабар беради.
"Фаолиятимнинг ушбу босқичида янги шартномадан максимал фойда олишни истайман. Бу мен футболчи сифатида имзолайдиган сўнгги битимлардан бири бўлади", — деди Кейн. "Бавария" спорт директори Макс Эберл мавсум якунлангач, музокаралар жадаллашишини тасдиқлаган. Клуб раҳбарияти келишувни июн ойи ўрталарида АҚШ, Канада ва Мексика мезбонлик қиладиган Жаҳон чемпионати бошлангунга қадар якунлашни мақсад қилган.
Бироқ Гарри Кейн масаланинг тезда ҳал бўлиши борасидаги кутилмаларни пасайтирди. Унинг сўзларига кўра, ҳозир музокаралар учун айни вақти эмас ва ҳар икки томон ҳам вазиятга хотиржам ёндашмоқда. Ҳужумчи аввал мавсумни, сўнгра Жаҳон чемпионатини якунлаб олиш ниятида эканини билдирди. Кейн клуб билан муносабатлари аъло даражада эканини ва раҳбарият билан очиқ мулоқотга тайёрлигини қўшимча қилди.
Маълумот учун, Гарри Кейн 2023-йилда Тоттенхем клубидан қарийб 100 миллион евро эвазига трансфер қилинган эди. Ҳозирда у йилига 25 миллион евро маош билан жамоанинг энг кўп ҳақ олувчи футболчиси ҳисобланади. Kicker нашрининг хабар беришича, клуб раҳбарияти шартномани икки йилга узайтиришни кўриб чиқмоқда, футболчининг ўзи эса 2030-йилгача мўлжалланган келишувни афзал кўрмоқда.
Собиқ футболчи Диетмар Ҳаманн эса клубни узоқ муддатли шартнома борасида эҳтиёткор бўлишга чақирди. Унинг фикрича, Кейннинг ёши 33 га етаётгани сабабли, уч йиллик битим таваккалчилик бўлиши мумкин. Ҳаманн бир ёки икки йиллик узайтиришни мақбул вариант деб ҳисобламоқда. Шунга қарамай, Гарри Кейн Германия рекордчиси сафида ўтказган уч мавсуми давомида сермаҳсуллик борасида юқори натижаларни қайд этиб келмоқда.
“Zamin”ни Telegram'да ўқинг!
