Атлетико Мадрид бош мураббийи Диего Симеоне ҳужумчи Хулиан Альварес атрофидаги трансфер миш-мишларига муносабат билдирди. Аргентиналик мутахассис футболчининг келажаги борасида берилган саволга кескин жавоб қайтариб, ҳужумчи ўз йўлини аллақачон танлаб бўлганига шама қилди. Мавсумнинг сўнгги ўйинида Виллареал жамоасидан қабул қилинган 1:5 ҳисобидаги мағлубиятдан сўнг, Симеоне матбуот эътиборини ўз юлдузига қаратди. Бу ҳақда Goal.com хабар беради.
Мовистар нашрига берган интервюсида Симеоне футболчининг Мадридда қолиш-қолмаслиги фақат унинг ўзига боғлиқлигини таъкидлади. "Бу саволни менга эмас, Жулианнинг ўзига бериш керак. У нима қилишни биладиган ёшда ва менимча, у аллақачон бир қарорга келиб бўлган", — дея қайд этди мураббий. Бу гаплар Мадрид клуби мухлислари орасида Жаҳон чемпиони жамоани тарк этиши борасидаги хавотирларни кучайтирди.
Ҳозирда Хулиан Альварес хизматларига Англия Премер-лигаси ва Лига 1 грандлари жиддий қизиқиш билдирмоқда. Хусусан, Арсенал устози Микел Артета ҳужум чизиғини кучайтириш мақсадида аргентиналикни ўз сафига қўшиб олмоқчи. Шунингдек, Барселона ва PSJ ҳам вазиятни диққат билан кузатиб бормоқда. Бироқ ҳар қандай келашув учун камида 100 миллион евродан ортиқ маблағ талаб этилиши айтилмоқда.
Атлетико Мадрид раҳбарияти эса футболчини сотиш ниятида эмаслигини қатъий билдирган. Собиқ Манчестер Сити аъзоси билан имзоланган шартнома 2030-йилгача амал қилади ва унда 500 миллион евро миқдоридаги товон пули белгиланган. Клуб раҳбарияти Антуан Гризманн кетганидан сўнг, айнан 26 ёшли Альваресни жамоанинг янги лойиҳаси марказига қўймоқчи.
“Zamin”ни Telegram'да ўқинг!
