Ливерпул ҳимоячиси Энди Робертсон Англия Премер-лигасини Италия чемпионатига алмашган навбатдаги таниқли шотландиялик футболчига айланиши мумкин. Ювентус чап қанот ҳимоячисига жиддий қизиқиш билдирмоқда. Скотт МкТоминайнинг муваффақиятли трансферидан сўнг, мерсисайдликлар сафида тўққиз йил давомида кўплаб совринларни қўлга киритган Робертсон ҳам ўз фаолиятида янги саҳифа очиш ҳақида ўйламоқда. Бу ҳақда Goal.com хабар беради.
Италиялик журналист Джанлука Ди Марзио хабарига кўра, Ювентус раҳбарияти тажрибали ҳимоячини ўз сафига қўшиб олиш бўйича дастлабки қадамларни ташлаган. Туринликлар жамоа ҳимоя чизиғини қайта қуриш жараёнида Робертсоннинг бой тажрибасидан фойдаланмоқчи. Бироқ, бу борада Италия клубига Тоттенхем жиддий рақобат туғдириши кутилмоқда, чунки Лондон клуби ҳам футболчини ўз сафида кўришни истайди.
Шунингдек, Ювентус фақат Робертсон билан чекланиб қолмоқчи эмас. Туринликлар Ливерпул дарвозабони Алиссон Беккер бўйича ҳам сўров юборган. Бразилиялик посбон Италия футболи билан яхши таниш, у ўз вақтида Рома сафида ёрқин ўйинлар кўрсатган. Алиссон жамоада етакчилик қобилиятини ошириш учун асосий номзод сифатида кўрилмоқда.
Собиқ ҳимоячи Джон Арне Риисе эса Алиссоннинг кетишига шубҳа билан қарамоқда. Унинг фикрича, бразилиялик дарвозабон Ливерпул учун ўта муҳим фигура ва ҳозирги кунда унинг даражасидаги бошқа посбонни топиш деярли имконсиз. Шунга қарамай, Ювентус ўтган омадсиз мавсумдан сўнг таркибга тажрибали юлдузларни жалб этиш орқали янги ғалабали даврни бошлашни мақсад қилган.
“Zamin”ни Telegram'да ўқинг!
