Интер Миами клуби ҳужумчиси Лионель Месси Филадельфия Юнионга қарши ўйинда олган жароҳати сабабли сафдан чиқди. 38 ёшли футболчи жисмоний ноқулайлик туфайли майдонни тарк этишга мажбур бўлган эди. Душанба куни ўтказилган тиббий кўриклар натижасида унинг чап оёғи тиззасости пайларида мушак толиқиши ва зўриқиш аниқланган. Бу ҳақда Goal.com хабар беради.
Клуб расмий баёнотига кўра, Мессининг майдонга қайтиши унинг тикланиш жараёни ва клиник ҳолатига боғлиқ бўлади. Ҳозирча аниқ муддатлар кўрсатилмаган бўлса-да, инсайдер Fabrizio Romano аргентиналик юлдуз июн ойида старт оладиган Жаҳон чемпионатига қадар тўлиқ тайёр бўлишини хабар қилмоқда.
Лионель Месси жорий мавсумда Интер Миами таркибида 15 та ўйиндан 14 тасида иштирок этиб, 12 та гол ва 8 та голли узатмани амалга оширди. Охирги икки мавсумда MVP унвонини қўлга киритган ҳужумчи жамоасининг энг муҳим фигураси бўлиб қолмоқда.
Аргентина терма жамоаси 16-июн куни Канзас-Сити шаҳрида Жазоирга қарши ўйин билан ўз унвонини ҳимоя қилишни бошлайди. Унгача эса жамоа иккита ўртоқлик учрашувида майдонга тушиши режалаштирилган. Интер Миами эса навбатдаги лига ўйинини 22-июль куни ўтказади.
Ҳозирда Интер Миами жамоаси 15 та ўйиндан сўнг 31 очко жамғарган ҳолда Шарқий конференция турнир жадвалида иккинчи ўринни эгаллаб турибди. Мухлислар сардорнинг тезроқ сафга қайтишини интизорлик билан кутишмоқда.
“Zamin”ни Telegram'да ўқинг!
