Каталониянинг Барселона клуби Англия терма жамоаси ҳужумчиси Маркус Рэшфорднинг трансфери бўйича Манчестер Юнайтед билан музокараларнинг янги босқичини бошлашга тайёрланмоқда. Хабарларга кўра, клуб футболчи билан шахсий шартнома шартларини келишиб олган. Бош мураббий Ханси Флик Рэшфордни ўзининг ҳужум чизиғидаги режалари учун муҳим ўйинчи деб ҳисобламоқда. Бу ҳақда Goal.com хабар беради.
Барселона футболчининг Испаниядаги муваффақиятли ижара муддатидан сўнг унинг трансферини тўлиқ сотиб олиш ҳаракатларини жадаллаштирмоқда. талкСПОРТ нашрининг маълум қилишича, каталонияликлар 2026-йилги Жаҳон чемпионатига қадар Манчестер Юнайтед билан келишувга эришмоқчи. Рэшфорд ўтган мавсумда 49 та ўйинда майдонга тушиб, 14 та гол ва 14 та голли узатмани амалга оширган.
Манчестер Юнайтед раҳбарияти эса ўз позициясида қатъий турибди. Англия Премер-лигаси вакили футболчи учун 30 миллион евро талаб қилмоқда ва яна бир бор ижара шартномасига рози эмас. "Қизил иблислар" Рэшфордни бутунлай сотиб юбориш орқали унинг юқори маошидан қутулишни ва таркибни қайта қуриш учун маблағ йиғишни кўзламоқда.
Барселона спорт директори Деко трансфер нархини пасайтириш ёки тўловни бўлиб-бўлиб амалга ошириш вариантларини кўриб чиқмоқда. Гарчи клуб рўйхатида Атлетико Мадрид ҳужумчиси Хулиан Альварес ва Челси аъзоси Жоау Педро каби номлар бўлса-да, Маркус Рэшфорд Ханси Флик учун асосий мақсад бўлиб қолмоқда. Футболчининг ўзи ҳам Олд Траффордга қайтиш ниятида эмаслигини билдирган.
“Zamin”ни Telegram'да ўқинг!
