Европа чемпиони Барселона ўзининг ҳимоя қўрғонлари Мапи Леон ва Она Батлле келаси ой охирида шартномалари якунлангач, клубни тарк этишини расман тасдиқлади. Бу янгилик клуб афсонаси Алексиа Путельяс Каталониядан кетишини эълон қилганидан бир неча кун ўтиб содир бўлди. Ушбу кетишлар сўнгги йилларда ҳам ички, ҳам Европа майдонларида гегемонлик қилган жамоа учун жиддий ўзгаришлар даври бошланганидан далолат беради. Бу ҳақда Goal.com хабар беради.
Леон ва Батлле жорий мавсумда Барселона билан тарихий квадрупл (тўртта соврин) қайд этишда муҳим рол ўйнашди. Жамоанинг муваффақиятли юриши Ослода ўтган Чемпионлар лигаси финалида Лион устидан қозонилган 4:0 ҳисобидаги ғалаба билан якунланган эди. Эндиликда ҳар икки ҳимоячи Испания чемпионатини тарк этиб, фаолиятини Англия аёллар суперлигасида (ВСЛ) давом эттиришга яқин турибди.
ESPN нашрининг хабар беришича, 30 ёшли Мапи Леон Лондон Сити Лаёнессес клуби билан музокараларнинг якуний босқичида турибди. 2017-йилда Атлетико Мадрид жамоасидан келиб қўшилган Леон Барселона сафида 300 дан ортиқ ўйин ўтказиб, 27 та соврин, жумладан, 4 та Чемпионлар лигаси кубогини қўлга киритган ҳақиқий афсонага айланди.
Она Батлле эса катта эҳтимол билан Арсенал сафига бориб қўшилади. Аввалроқ Манчестер Юнайтед сафида ўзини кўрсатган қанот ҳимоячиси 2023-йилда ўзининг қадрдон клубига қайтган эди. Унинг универсал маҳорати Барселона учун сўнгги муваффақиятли мавсумларда калит вазифасини ўтади. Эндиликда у Ренее Слегерц қўл остидаги Арсенал жамоасига Челси ва Манчестер Сити билан рақобатда ёрдам бериши кутилмоқда.
“Zamin”ни Telegram'да ўқинг!
