“Барселона” ёзги трансфер ойнасида тажрибали ярим ҳимоячи Бернарду Силвани ўз сафига қўшиб олиш имкониятини кўриб чиқмоқда. “Tot Costa” маълумотига кўра, каталонияликлар португалиялик футболчининг вакиллари билан трансфер шартлари бўйича келишувга эришган.
Бироқ ушбу трансфернинг якуний тақдири “Барселона” бош мураббийи Ханси Флик қарорига боғлиқ бўлиб турибди. Клуб таркиб режаси ва янги мавсум учун устувор позициялар бўйича якуний баҳолашни амалга ошириш учун бироз вақт сўраган. Шу сабаб ҳозирча келишув тўлиқ якунланган деб бўлмайди.
Маълум қилинишича, “Манчестер Сити” ярим ҳимоячиси “Барселона”да ўйнашни жуда истамоқда. Ҳатто трансферни осонлаштириш мақсадида маошини сезиларли даражада камайтиришга ҳам тайёр. Бу эса футболчининг Каталония клубига ўтиш нияти жиддий эканини кўрсатади.
Бернарду Силванинг агенти Жорже Мендеш ҳам мижози “кўк-анорранглилар” сафида тўп тепишга тайёр эканини тасдиқлаган. Аввалроқ айрим манбалар Ханси Флик ушбу трансферни қўллаб-қувватлаётганини маълум қилган эди. Энди эса барча томонлар якуний қарорни кутишмоқда.
Манбаларга кўра, яқин соатлар 31 ёшли ярим ҳимоячининг келажагини ҳал қилиши мумкин. Бернарду Силва “Манчестер Сити”ни эркин агент сифатида тарк этади, бу эса “Барселона” учун молиявий жиҳатдан қулай имконият ҳисобланади.
Қисқаси, Бернарду Силва “Барселона”га ўтишга яқин турибди. Футболчи тайёр, вакиллар билан келишув бор, энди сўнгги сўз Ханси Флик ва клуб режаларида қолмоқда. Агар трансфер амалга ошса, Каталония ярим ҳимоясига катта тажриба ва ақлли футбол қўшилади.
“Zamin”ни Telegram'да ўқинг!
