Европа Чемпионлар лигасининг 2025/2026 йилги мавсуми ўз якунига етди. Ҳал қилувчи финалда “ПСЖ” Лондоннинг “Арсенал” клубини пенальтилар сериясида мағлуб этиб, кетма-кет иккинчи марта турнир ғолибига айланди.
Мавсум якунларига кўра, Мадриднинг “Реал” клуби ҳужумчиси Килиан Мбаппе Чемпионлар лигасининг энг яхши тўпурари бўлди. Франциялик юлдуз мусобақа давомида рақиблар дарвозасини 15 марта ишғол қилиб, индивидуал жиҳатдан яна бир кучли натижа қайд этди.
Мбаппедан кейинги ўринни “Бавария” вингери Луис Диас эгаллади. Колумбиялик футболчи турнирда 14 та гол уриб, тўпурарлик пойгасида охиригача рақобатни сақлаб турди. Аммо якунда бир голлик фарқ Мбаппега устунлик берди.
Эътиборлиси, Килиан Мбаппе бу мавсум фақат Чемпионлар лигасида эмас, Испания чемпионатида ҳам тўпурарликни қўлга киритган эди. У Ла Лигада 25 та гол уриб, “Реал” ҳужумидаги асосий кучлардан бири бўлганини яна бир бор исботлади.
Қисқаси, “ПСЖ” Чемпионлар лигасида бош совринни қўлга киритган бўлса, турнирнинг голлар бўйича қироли Килиан Мбаппе бўлди. Франциялик ҳужумчи клуби билан кубоксиз қолган бўлиши мумкин, аммо шахсий статистикада яна топ даражани кўрсатди.
“Zamin”ни Telegram'да ўқинг!
