Коутиньо янги йилнинг биринчи кунида «Барселона» футболчиси бўлиши кутилмоқда

«Барселона»нинг техник ҳомийси ҳисобланмиш Nike фирмаси расмий интернет-магазинида «Ливерпуль» ҳавбеки Филиппе Коутиньо фамилияси ёзилган каталонияликлар жамоаси футболкалари варианти қўшилди.

«Филиппе Коутиньо «Камп Ноу»да ўзини кўрсатишга тайёр. «Барселона»нинг ушбу сеҳргар фамилияси остидаги футболкаларини сотиб олинг», – дейилганди компания сайти хабарида.

Кейинроқ ушбу маҳсулот олиб ташланган, аммо интернет фойдаланувчилари скриншотлар олишга улгуришган. Ҳозирча бу сайтни бузиб кирган ҳакерлар ҳазилими ёки «Барселона»нинг техник ҳамкори футболчи трансфери ҳақида барвақт хабар бериб юбордими, буниси номаълум.

Бундан ташқари, URL-манзилда ушбу футболка сотуви 2018 йилнинг 1 январида бошланиши кўринади. Кўп эҳтимол билан шу куни «Барселона» янги футболчиси трансферини амалга оширади.

Каталонияликлар жамоаси ушбу футболчини қўлга киритиш ҳаракатларини ёздаёқ бошлаганди. Ушбу футболчи трансфери учун 150 миллион евро тўланиши ва у билан 5 йиллик шартнома имзоланиши кутилмоқда.

Бундан аввалроқ Коутиньо Барселонадан ўзига уй қидираётгани ҳақида хабарлар берилганди.

Манба: Kun.uz